Әдетте үшем дүниеге келгенде әкімдіктен арнайы барып құттықтап, сый-сияпат жасап жататыны белгілі. Ал Шиен ауылындағы Әбсемет ата әулетінде былтыр жазда үшем дүниеге келгенде мұндай қошемет болған жоқ. Себебі, шақалақтардың ата-аналары көз тимесін деген қазақы ырыммен жалпақ жұртқа жариялауды жөн санамаған болатын. Оның үстіне, пандемия жағдайына байланысты да сүйінші сұрайтын сәтті кешеуілдетуге тура келген.
Сол үшем жуырда бір жасқа толды. Әмина, Айша және Айзия есімді үш қыздың денсаулықтары қазір жақсы, өсулері қалыпты. Аяқтарын тәй-тәй басуға жарап қалған үш періште сәбидің ата-анасы Тоқтар Әбсеметов пен Әйгерім Сатыбалдиеваның тұңғыштары. Олар бұған дейін ұзақ жыл бала сүйе алмай жүрген болатын.
Сәби аңсаған жас отбасы дәрігерден дәрігерге қаралып, тиісті тексерулерден өтіп, медицинаның заманауи жетістіктеріне жүгінген еді. Нәтижесінде армандарына қол жетті. Шаңырақтарында бірден үшемнің дүниеге келетінін білгенде олардың бойларында жүрекжарды қуанышпен қатар қалай болар екен деген қорқыныш та жоқ емес еді. Алғашқы кездегі күдіктің орнын бара-бара сенім алмастырды.
Шүкір, бәрі де ойдағыдай болып, өмірге дені сау ұрпақ келді. Біреу емес, үшеу! Міне, бақыт, міне, ғажап! Тоқтар Көшімханұлы мен Әйгерім Доқтырбекқызы қазір өздерін бақытты санайды.
Тоқтар үйдің кенжесі болғандықтан олар қара шаңырақта ата-анасымен бірге тұрады. Әкесі Көшімхан қарапайым шаруа адамы болса, шешесі Гүлзада мектепте мұғалім. Немерелерін бағып-қағып жатқан негізгі күтушілері де солар. Үшемнің атасы мен апасы Жаратқанның өздеріне берген сыйына шексіз риза.
Серік САТЫБАЛДИЕВ
Шиен ауылы,
Жамбыл ауданы
Алматы облысы
