Өңірдегі шаруалар көктемгі дала жұмыстарын бастауға дайын отыр. Тек жердің тоңы жібіп, күннің жылынғанын күтуде. Текелілік диқандар биыл мол өнім алуға ниетті. Егін егу, оны күтіп-баптау, жинау жұмыстары үшін шаруалардың тракторлары, жүк көліктері, комбайндары сақадай сай тұр.
Текелі қаласы әкімінің баспасөз қызметі берген ақпаратқа сүйенсек, биыл аймақ бойынша егістік көлемі 273 гектар жерді құрап отыр. Бұның 205 гектарына жаздық арпа себілсе, 10 гектарына дәндік жүгері, 28 гектарына қытай бұршағын (соя) себу жоспарланған. Ал 3 гектар алқапқа картоп, 2 гектар жерге көкөніс, 25 гектарға жонышқа егу көзделген.
Қазіргі уақытта Текелі қаласының ауылшаруашылық жерлері таулы аймаққа жақын орналасуына байланысты көктемгі егістік жұмыстарын бастауға әлі ерте екені белгілі. Көктемгі егістік (күздік жыртылған жерлерді тырмалау, жерлерді жырту және дақылдарды егу) жұмыстарын шаруашылықтар сәуір айының екінші жартысынан бастамақ.
Медет ЖҰМАБАЙ
Текелі қаласы
Фото: baraev.kz
