«Nur Otan» партиясы Алматы облыстық филиалы жанындағы сыбайлас жемқорлыққа қарсы іс-қимыл жөніндегі қоғамдық кеңестің отырысы өтті. Жиынға қоғамдық кеңес мүшелері, облыстық департамент, басқарма басшылары қатысты.
«Nur Otan» партиясы Алматы облыстық филиалы жанындағы сыбайлас жемқорлыққа қарсы іс-қимыл жөніндегі қоғамдық кеңес төрағасы Серік Мұқанов күн тәртібінде көтерілетін мәселелермен таныстырды.
— Бүгінгі отырысымыздың күн тәртібінде маңызды да өзекті мәселе көтеріп отырмыз. Өңірлерді дамыту бағдарламасының Алматы облысында орындалу барысы, кәсіпкерлік және индустриялық-инновациялық даму басқармасындағы сыбайлас жемқорлыққа қарсы іс-қимыл жөніндегі жұмыстың жай-күйі және «Nur Otan» партиясы Алматы облыстық филиалы жанындағы сыбайлас жемқорлыққа қарсы іс-қимыл жөніндегі қоғамдық кеңес атқарған жұмысы туралы талқылаймыз, — деген Серік Мейірханұлы баяндамашыларға сөз берді.
“Nur Otan” партиясы облыстық филиалы партиялық бақылау жөніндегі инспектор Мақсұт Тобаев, облыстық экономика және бюджеттік жоспарлау басқармасының басшысы Жомарт Әмірханов, кәсіпкерлік және индустриялық инновациялық даму басқармасының басшысы Тамерлан Разбеков атқарып жатқан жұмыстар жайлы баяндады. “Nur Otan” партиясы облыстық филиалы партиялық бақылау жөніндегі инспектор Мақсұт Тобаев:
— Облыс бойынша «Өңірлерді дамыту» бағдарламасын іске асыру барысын бақылау мақсатында облытық прокуратурамен талдау жүргізілді. Бүгінде тұрғын үй алуға кезекте тұрған азаматтардың жалпы саны 51 538 адамды құрайды. Талдау барысында алынған деректер облыстың жергілікті атқарушы органдары заңдылықтың елеулі бұзылуына жол беретіндігін дәлелдейді. Кезекте тұрған үміткерлердің көптігіне байланысты жаңа тұрғылықты жері бойынша жаңадан кезекке тұрған адамның тұрғын үй алуға мүмкіндігі ондаған жылға шегеріледі дегенді көрсетіп отыр, — деп тұрғын үй кезегіне тұру кезінде кеткен кемшіліктерді атап өтті. Өз кезегінде Серік Мейірханұлы «Nur Otan» партиясы Алматы облыстық филиалы жанындағы сыбайлас жемқорлыққа қарсы іс-қимыл жөніндегі қоғамдық кеңестің атқарған жұмысына тоқталды.
Жиында көтерілген мәселелерге қатысты Қаулы қабылданып, атқарылуы тиіс жұмыстар талқыланды.
Мәулен ӘНЕРБАЙ
Алматы облысы
