Талдықорғанда облыс орталығының бас жоспарын әзірлеу бойынша арнайы қоғамдық талқылау өтті. Қала әкімі Ернат Бәзілдің қатысуымен өткен басқосуда шаһарды одан әрі дамытудың тың бастамалары атап көрсетіліп, жобаны әзірлеуші авторларға түрлі сауалдар қойылып, ортақ ой бөлісті.
Жауаптылардың сөзінше, халықтың пікірін ескеру үшін қоғамдық тыңдау өткізілуде. Бұл екінші қоғамдық тыңдалым. Халық белсене қатысып, өздеріне қолайлы болуы үшін қажетті тұстарын айтуда. Қаланың бүгіні мен болашағы туралы бұл жоба көптеген жаңа мүмкіндіктерге жол ашады. Талқылауда қала жанашырлары шаһардың болашағына, әсіресе жол тораптары мен мәдени, әлеуметтік нысандарының орналасуына үлкен қызығушылық танытқан.
– «Біз Талдықорған қаласының бас жоспарының заман ағымына сай болуы үшін жүйелі түрде жұмыс істеп жатырмыз. Осы бас жоспарды облыс орталығы мен оған қарасты 2 ауылдық округті және шаһардың территориясындағы барлық саяжай қоғамдастықтарын еңгізе отырып әзірледік. Мәселен, қолданыстағы сыртқы көлік инфрақұрылымын (Өскемен-Алматы тас жолы) басты жоспарлау кіндігі ретінде пайдалана отырып, авто және теміржолмен біріктірілген көлік торабын еңгізіп, көлік-логистикалық орталықты қарастырдық. Осы барыста сыртқы көлік инфрақұрылымын пайдалана отырып, халыққа қызмет көрсететін шағын және орта бизнесті, туризмді, ауылшаруашылық құрылымдарын дамыту көзделді. Сондай-ақ, қаланың тағы басқа да қауіпсіздігін жетілдіруге қатысты табиғи кедергілерді көпірлер, жол өтпелерін салу арқылы жаңғыртуға, кеңейтуге, қайта құрылымдауға баса назар аудардық», — дейді Талдықорған қаласының бас жоспарының авторы, «АТС Град» ЖШС-нің бас сәулетшісі Ерұлан Көкен.
Айдын КӘЛІМХАН
