Биылғы 11 айдың қорытындысы бойынша отандық өндірушілермен жалпы сомасы 1,1 трлн теңгеге жуық ұзақ мерзімді және оффтейк-келісімшарттар жасалды. Бұл өткен жылмен салыстырғанда 7,7 есе көп. Мемлекет басшысының тапсырмасы аясында енгізілген жаңа қолдау шараларының тиімділігі туралы Үкіметтің баспасөз конференциялары сериясында өнеркәсіп және құрылыс вице-министрі Олжас Сапарбеков мәлімдеді, деп хабарлайды 7-su.kz ақпараттық порталы.
Вице-министрдің айтуынша, мұндай айтарлықтай өсімге бірнеше жүйелі шешімдер ықпал еткен. Атап айтқанда, мемлекеттік сатып алуларда отандық тауарлардың тізбесі 4,8 мың позицияға дейін кеңейтілді. Сонымен қатар жер қойнауын пайдаланушылар үшін Tizilim платформасы қайта жаңғыртылып, сатып алу рәсімдері оңтайландырылды.
«Біз стандартталмаған тауарларды биржалар арқылы сатып алуды алып тастап, отандық өндірушілерге басымдық беретін қол жеткізу тетіктерін жетілдірдік. Бұл қабылданған шаралар ұлттық экономиканың тұрақты өсіміне берік негіз қалайды», – деді Олжас Сапарбеков.
