Иә, шабытқа бөлеген керім кештің көзайымы болдық. Алматыдағы Ахмет Жұбанов атындағы дарынды балаларға арналған қазақ мамандандырылған музыка мектеп-интернатының талантты жасы, халықаралық, республикалық байқаулардың лауреаты Азамат Құдайбергеннің жеке концерті өтті.
Қазақстанның халық әртісі, ҚР Мемлекеттік сыйлығының лауреаты Нұрғиса Тілендиевтің 100 жылдығына арналған «Сүйікті қалам. Талдықорған өзіңе арнаймын өнерімді!» атты концертін музыка мектебінің оқушылары «Құстар қайтып барады» әнімен бастады. Өз кезегінде қазақ және әлемдік музыка шедеврлері орындалды.
Жетісу жеріне ғана емес, қазақ халқына есімі таныс, өнер әлемінде өзіндік орыны бар Құдайбергеновтер әулетінің өкілі, жас саңлақ Азамат Құдайбергеннің жеке концертінде кеш кейіпкерінен бөлек Жасмин Даниярқызы, Нұрәлі Түктібаев, Айбар Әділұлы, Сұлтан Даниярұлы секілді қаршадай таланттар да төбе көрсетіп, Луиджи Боккерини, Феликс Мендельсон, Бернхард Гольтерман, Латиф Хамиди, Давид Поппер, Иоганн Себастьян Бах сияқты музыка алыптарының туындыларын орындады.
Жас та болса талантымен талай елді тамсандырып, қазақ халқының мерейін үстем етіп жүрген Азамат Құдайбергеннің өнер жолындағы қарышты қадамы сүйсінтеді. Ол талмай ізденіп, телегей тер төккенде ғана саз өнерінің сайыпқыранына айналатынын сезгендей болдық. Бұл ретте өзінің қиялынан туған туындыларын орындаған Нұрғиса Тілендиевтің сүйікті жары Дариға апамыздың кіндік баласы Нұрәлі Түктібаевтің де өнері сүйсінтті. Ал, Талдықорғанның тумасы, мектеп-интернаттың 1-сынып оқушысы Сұлтан Даниярұлы алғашқы гастрольдік сапарын Талдықорғаннан бастап отырса, Айбар Әділұлы, Жасмин Даниярқызының да орындау шеберліктері көңіл толқытты.
Ахмет Жұбанов атындағы дарынды балаларға арналған қазақ мамандандырылған музыка мектеп-интернатының ұстазы Айымжан Гильманованың ұйымдастыруымен Талдықорған қаласындағы Н. Тілендиев атындағы музыка мектебінде өткен кештен көпшілік терең әсермен тарқасты. Біз де өнерін еліне арнаған бес қарлығаштың қанатқақты концертінен ризашылықпен аттандық.
АРДА БИ
