Қай мемлекет болмасын оның болашағы заңның үстемдігіне, азаматтарының құқықтарының қорғалуына және қоғамдағы әділеттілікке байланысты. Осы тұрғыдан алғанда, жаңа Конституцияның қабылдануы – еліміздің дамуына тың серпін берген маңызды тарихи шешім.
Бүгінде мемлекет пен қоғам арасындағы қарым-қатынас бұрынғыдан да ашық әрі жауапты болуы тиіс. Жаңа Конституция осы талаптарға жауап беретін құқықтық негіз қалыптастырып, мемлекеттік басқарудың тиімділігін арттыруға, азаматтардың пікірін ескеруге және олардың құқықтарын сенімді қорғауға бағытталған. Бұл – уақыт талабынан туған өзгеріс.
Қоғамда азаматтардың мемлекеттен күтетін ең басты талабы – әділдік. Заңның бәріне бірдей қызмет етуі, адамның құқығы мен бостандығының қорғалуы, мемлекеттік органдардың халық алдында жауапкершілігінің артуы – осының барлығы жаңа Конституцияның негізгі ұстанымдарымен сабақтас. Бұл құжат мемлекеттің ғана емес, қоғамның да жаңаруына жол ашады.
Қазір жастардың құқықтық сауатын арттыру ерекше маңызға ие. Конституцияны білетін, заңды құрметтейтін, өз құқығы мен міндетін түсінетін жас буын ғана еліміздің тұрақты дамуына үлес қоса алады. Заңды сыйлау – өркениетті қоғамның белгісі, ал заңға бағыну – әрбір азаматтың мәдениеті.
Жаңа Конституция азаматтардың мемлекет ісіне белсенді араласуына, қоғамдық пікірдің ескерілуіне және ашықтық қағидаттарының нығаюына мүмкіндік береді. Бұл өз кезегінде халық пен билік арасындағы сенімді арттырып, қоғамның бірлігі мен тұрақтылығын күшейтеді.
Біздің мақсат – Конституцияны тек мерекелік күндері ғана еске алатын құжатқа айналдырмай, оның қағидаларын күнделікті өміріміздің ажырамас бөлігіне айналдыру. Заң үстемдік еткен жерде ғана әділдік орнайды, азаматтардың құқықтары қорғалады және мемлекет тұрақты дамиды. Сондықтан жаңа Конституцияны еліміздің жаңғыруының құқықтық негізі әрі болашаққа бастайтын сенімді бағдар деп бағалаймын.
Ғалия Ақбасова,
Кербұлақ аудандық аналар кеңесінің төрайымы
