Бұл реткі сенбіліктің тағы бір артықшылығы – көктемгі тазалық шараларымен қатар ортаны көгалдандыруға да көңіл бөлінді. Жалпы биыл облыс бойынша 120 мың түп көшет отырғызу жоспарланған. «Бәріміз бірге» акциясының аясында отырғызылған 1 360 түп ағаштың 1160-ы жапырақты, 200-і қылқанжапырақты жас өскіндер.
Талдықорған қаласындағы сенбілікте облыс әкімі Бейбіт Исабаев бастаған мемлекеттік және бюджеттік сала қызметкерлері, еңбек ұжымдары, қоғамдық ұйым өкілдері, қала тұрғындары Назарбаев даңғылының бойындағы Қаратал өзенінің маңын тазартты.
Сенбілікте қураған шөп жиналып, шашылып жатқан қатты қалдықтар терілді. Жол бойы қураған ағаш бұтақтары қиылып, күл-қоқыстан тазартылды. Жиналған қоқыстар техникаға тиеліп, тиісті орындарға төгілді.
Өткен жылдан бері дәстүрлі түрде өткізілетін мұндай шаралар қала тазалығына, экологиялық мәдениетті қалыптастыруға әсер етуде. Бүгінде көпқабатты немесе жеке тұрғын үйлер өз ауласын тазалауды әдетке айналдырған.
Мұндай сенбіліктер қоршаған орта үшін де, тұрғындар үшін де пайдалы.
Қажет АНДАС
Фото: baraev.kz
