Панфилов ауданындағы төрт түлік саны өткен жылмен салыстырғанда екі есеге жуық өсті. Қазір 102 089 ірі қара, 327 173 ұсақ мал, 25269 жылқы, 448 түйе жайлы қыстатылуда.
Сәйкесінше ет, сүт өндірісі өсіп, мал бордақылау алаңдарының жүктемесі өткен жылғы көрсеткіштен екі есеге артты. Ауданда 1400 ірі қараға арналған 8 және 500 қойға арналған 1 мал бордақылау алаңы жұмыс істейді. Ауыл шаруашылығы тауарларын өндіруге сүбелі үлес қосып, азық-түлік қауіпсіздігін қамтамасыз етіп отырған 2 ірі кәсіпорын бар. Олардың алғашқысы «Көктал Агро» ЖШС 1150 сауын сиырға арналған фермасынан жылына 6,5 мың тонна сүт өндіреді.
Ферма іске қосылған сәттен бастап мұндағы сиыр сауу технологиясы арнаулы 36 құлтемірмен іске асырылуда. Қазір фермада 650 бұзаулаған сиыр сауылып, әрқайысынан жылына 10 тонна сүт алынады. Екінші кәсіпорын «KAZAHSTAN YUZHENG TRADING» ЖШС салған жүгері кептіретін және қоспажем тартатын зауыт. Оның бірінші өндірістік кезеңі іске қосылды. Зауытты толық қуатында жүйеге енгізу үшін 2026 жылы 1,5 млрд. теңге инвестиция салу жоспарланған.
Бұл кәсіпорынның жүгері дәнін кептіру қуаты тәулігіне 260 тоннаға жеткізілмек. Жыл соңына дейін зауыт 70 мың тонна өнім шығаруды жоспарлап отыр. Жаңа зауыт толық қуатында жұмыс атқарса өңірдегі мал бордақылап сатушылар мен жалпы төрт түлік өрістетуді кәсіп еткен қожалықтар үшін аса қажет қоспажем бағасы едәуір арзандайтыны ақиқат.
Мырзағали Нұрсейіт
Панфилов ауданы
