Қазақстан Президенті Қасым-Жомарт Тоқаев А.Н. Сызғанов атындағы Ұлттық ғылыми хирургия орталығының ұжымын ерекше операцияны сәтті жүзеге асыруымен құттықтап, арнайы Алғыс хат жолдады.
Жуырда аталған медициналық мекеме еліміздің медицина тарихында алғаш рет үш науқасқа үш түрлі донордың бүйрегін тоғыспалы трансплантация әдісі арқылы бір мезетте салу секілді күрделі операцияны сәтті өткізді. Хирургия орталығының бұл табысы – отандық медицинаның жаңа белеске көтерілгенін айқын көрсетеді.
Мемлекет басшысы жоғары деңгейде орындалған бұл операцияны отандық медицинаның зор жетістігі деп атап өтті. Сонымен қатар, Президент белгілі хирург, профессор Болатбек Баймахановтың жетекшілігімен жасалған бұл күрделі отаны жоғары бағалап, орталық дәрігерлеріне ризашылығын білдірді.
– Мемлекет денсаулық сақтау саласын дамытуға баса мән береді. Соның нәтижесінде ұлттық медицина қарқынды дамып келеді. Сіздер жасаған бірегей операция – соның айқын дәлелі. Қазір еліміз өте күрделі трансплантациялық операция жасайтын әлемдегі алты мемлекеттің қатарына кіреді. Бұл жетістікке отандық мамандардың қажырлы еңбегі мен теңдессіз тәжірибесінің арқасында жетіп отырмыз, – делінген Президенттің Алғыс хатында.
Сондай-ақ Мемлекет басшысы орталық ұжымының ұлт саулығын жақсарту жолындағы еңбегіне сәттілік тілеп, болашақта да халыққа қалтқысыз қызмет етеді деген сенім білдірді.
Фото: Ақорда
