Мемлекет басшысының тапсырмасы бойынша білім беру саласында ауқымды инфрақұрылымдық жобалар іске асырылуда. Негізгі мақсат – әрбір балаға заманауи әрі қауіпсіз білім алу үшін қолайлы жағдай жасау, деп хабарлайды 7-su.kz ақпараттық порталы.
Жаңа оқу жылы басталғанға дейін 163 білім беру ұйымында жөндеу жұмыстары аяқталып, 138 мыңнан астам оқушы жаңартылған мектептерде білім алады.
Реновация бағдарламасы аясында 127 мектеп жаңартылып, 99 мыңға жуық балаға сапалы білім алуға мүмкіндік жасалды. Бұған қоса, 1 мыңға жуық ауылдық мектепте күрделі жөндеу жүргізілуде. Робототехника, химия, биология, физика және STEM пәндері бойынша 1108 жаңа кабинет орнатылды.
Кешенді жобалар мектептерді күрделі жөндеуді, заманауи құрал-жабдықтармен қамтуды, кітапхана мен асханаларды жаңартуды және қауіпсіздік жүйелерін енгізуді қамтиды.
Бұл шаралар қала мен ауыл мектептері арасындағы алшақтықты қысқартып, қазақстандық балалар үшін қолайлы білім беру ортасын қалыптастыруға бағытталған.
