Текелі қаласына қарасты Рудничный ауылының тұрғындары үшін биылғы 1 қыркүйек ерекше басталды. Жаңа оқу жылымен бірге ауылда 200 орындық заманауи мектеп пайдалануға берілді. Білім ордасы заңсыз иемденілген активтерді мемлекетке қайтарудан түскен қаражат есебінен салынған.
Мектептің ашылу салтанатына Жетісу облысының әкімі Бейбіт Исабаев пен облыс прокуроры Бауыржан Жұмақанов қатысып, ауыл тұрғындарын айтулы оқиғамен құттықтады.
– Осыдан бір жыл бұрын болашақ мектептің іргетасына капсула салған едік. Бүгінде құрылыс аяқталып, балалар заманауи әрі жайлы мектепте білім алатын мүмкіндікке ие болды. Бұл – сапалы білім алуға жасалған үлкен қадам, – деді Бейбіт Исабаев.
Жаңа мектепте физика, химия және биология кабинеттері, мультимедиялық сыныптар, зертханалар, кітапхана, еңбек шеберханалары, спорт залы, 72 орындық асхана және 70 орындық акт залы бар. Мектеп аумағында стадион, жүгіру жолдары мен балалар алаңы жабдықталған. Сонымен қатар мектеп жанында 30 орындық мектепке дейінгі шағын орталық бар.
Биыл білім ордасында 145 оқушы білім алады. Оларға 38 педагог сабақ береді. Мұнда жас мамандармен қатар тәжірибелі ұстаздар да еңбек етеді.
Ауыл тұрғындары жаңа мектептің ашылуын үлкен қуанышпен қабылдады. Көпбалалы ана Айнұр Жақияның айтуынша, бұрынғы мектепте қыс мезгілінде жағдай қолайсыз болған. Енді балалардың сапалы білім алуына барлық мүмкіндік жасалған.
Мектеп құрылысына Білім беру инфрақұрылымын қолдау қорынан 2 млрд 450 млн теңге бағытталған.
Жетісу облысында қайтарылған активтер есебінен жалпы құны 42 млрд теңгені құрайтын 29 әлеуметтік жоба жүзеге асырылуда. Оның 27-сі аяқталды.
