Алматыда өткен Чемпиондар лигасының топтық кезеңіндегі үшінші тур ойынында алматылық «Қайрат» пен Кипрдің «Пафос» командасы тең түсті, – деп хабарлайды 7-su.kz ақпараттық порталы.
Матчтың алғашқы минуттарынан-ақ тартыс басталды. Кездесудің басында «Пафос» сапынан Коррея ереже бұзып, қызыл қағаз алып, алаңнан қуылды. Осыдан кейін алаңда басымдық «Қайрат» жағында болғанымен, алғашқы таймда есеп ашылмады.
Ойын барысында «Қайрат» сапынан Дастан Сәтпаев пен Офри Арад ескерту алды. Екінші таймда он ойыншымен қалған қонақтар бірнеше қауіпті шабуыл ұйымдастырды. Қақпашы Темірлан Анарбеков бірнеше мәрте командасын голдан құтқарып қалды.
71-минутта «Пафос» ойыншысы гол соққанымен, төреші офсайд анықтап, голды есепке алмады. Қалған уақытта да есеп өзгермей, матч 0:0 есебімен аяқталды.
Осылайша «Қайрат» Чемпиондар лигасының топтық кезеңінде алғашқы ұпайына қол жеткізді.
