Облыстық төтенше жағдайлар департаменті құтқарушылары өрт қауіпсіздігі айлығы аясында Кербұлақ ауданы Аралтөбе ауылындағы жеке тұрғын үйлерді аралап, улы түтінді анықтайтын дабыл құрылғылар орнатты.
Ауқымды шара барысында мамандар үй-үйді аралап, пештерді тексеріп, мұржаларды тазалап, арнайы құрылғылар орнатып, ескі сымдардың қаупі туралы айтты. Сонымен қатар газ жабдығын дұрыс пайдалану ережелерін ескертті. Әсіресе, әлеуметтік аз қамтылған, көпбалалы отбасылар, мүмкіндігі шектеулі жандар мен зейнеткерлер тұратын үйге барды. Облыстық ТЖД мемлекеттік өрт бақылау басқармасының аға инженері Еламан Әубәкіров пешпен жылытылатын үйлерде мұржаның тазартылмауынан, пештің дұрыс орнатылмауынан, электр желілерінің шамадан тыс жүктелуінен қауіп көп екенін тілге тиек етті.
– Өрт оқиғаларының басым бөлігі жылу және электр жүйелерінің дұрыс жұмыс істемеуінен туындайды. Осыған байланысты бақылауды күшейтіп, тұрғын үйлерге улы газдан қорғайтын дабыл құрылғыларын орнатудамыз. Бүгін 70-тен астам үйге барып, профилактикалық жұмыс жүргіздік. Қарамаса қара пеш те қауіпті. Сондықтан тұрғындардан жылыту құралдарының жарамдылығын тексеруді, мұржаларды уақытылы тазартуды, электр желісін шамадан тыс жүктемеуді және пештерді қараусыз қалдырмауды сұраймыз, – дейді Еламан Әубәкіров.
Тұрғындар да пешпен жылытатын, өрт сөндіру бөлімдері алыс орналасқан мұндай ауылдарда түсіндіру жұмыстары аса маңызды екенін айтып, төтенше жағдай қызметкерлеріне ризашылықтарын білдірді.
– Ауылымызда 87 үй, 327 тұрғын бар. Бұл ауылда бәрі көмір, ағаш тасып пеш жағады. Тұрғындардың қауіпсіздігі басты назарда болғандықтан төтенше жағдайлар департаменті қызметкерлері жылда жылыту маусымы кезінде тексеріс жүргізеді. Бұрын мұржаны қолмен тазалайтынбыз. Қазір мамандар біз сияқты көпбалалы отбасылардың үйлеріндегі пешті тексеріп, мұржамызды тазалап береді. Осындай игі шаруаға мұрындық болғандарға ризашылығымызды білдіреміз. Өрт қауіпсіздігі әр тұрғын үшін маңызды – дейді ауыл тұрғыны Алдаберген Сұранбеков.
Ал өз кезегінде Жанар Ысқақ:
– Жалғызбасты ана болғандықтан бір өзім мұржа тазалай алмаймын. Сондықтан мамандарға арнайы барып, өтініш білдірдім. Электр желілерінің техникалық жағдайын қарап ақауларды анықтап, арнайы құрылғы орнатып берген қызметкерлерге алғыс білдіремін, – дейді.
Айта кетейік, жылыту маусымы аясында облыс бойынша 56 үйдің мұржасы тазартылып, 2085 хабарлағыш датчик орнатылды. Бұл әсіресе шалғай ауылдарда өрт пен көміртегі тотығынан улану қаупін едәуір азайтатыны анық.
Айдар ҚАЛИЕВ
