Кездесу барысында әр елді мекеннің көркі тазалықпен тікелей байланысты екенін атап өтті. Аудан орталықтарынан бастап шалғай ауылдарға дейінгі аралықта санитарлық ахуалды жақсарту, көшелер мен саябақтарды күтіп ұстау күн тәртібіндегі маңызды мәселе екенін айтты.
Жолдардың сапасын арттыру, жарық желілерін қалпына келтіру, жаңа шам бағаналарын орнату қажеттігі де назардан тыс қалған жоқ. Сондай-ақ, балалардың ойын алаңдарына қойылатын қауіпсіздік талаптарын күшейту басты міндеттердің бірі ретінде белгіленді.
Қала ішіндегі аялдамаларда ілініп өңі кеткен, ескірген жарнамаларды жаңарту, арық жүйелерін тұрмыстық қалдықтан тазарту, жаяу жүргіншілер жолдарын нақты белгілермен қамту осы жиында қозғалған нақты тапсырмалар қатарында болды.
Табиғатқа жанашырлықпен қарау да назардан тыс қалмады. Қураған ағаштарды кесіп, орнына жас көшеттер отырғызу, қылқанжапырақты мен жапырақты ағаштарды жоспарға сай көгалдандыру – «Таза Қазақстан» аясындағы маңызды шаралардың бірі.
Тұрғындардан келіп түскен өтініштер мен шағымдарды Telegram-бот арқылы қабылдап, әрбіріне дер кезінде жауап беру – мемлекеттік органдардың жауапкершілігін арттыруға бағытталған тиімді әдіс екені айтылды.
– Ұлы Жеңістің 80 жылдығына орай барлық ескерткіштер жаңартылып, тарихи мұралар жаңаша кейіпке енді. Бұдан бөлек, биыл 20-ға жуық көпқабатты тұрғын үйдің қасбеті жаңартылып, 40 үйдің шатырын жаңалау жоспарланып отыр. Ал аудандардағы жұмыстардың сапасын бақылау үшін арнайы мониторингтік топ құрылып, жүйелі қадағалау жүргізіледі, – деді Марлен Көлбаев.
Бұл бастамалар жай тапсырма ғана емес, туған өлкені түлету жолындағы нақты қадам. Өңірдің әрбір тұрғынының белсенділігі мен жауапкершілігі осындай ортақ іске серпін берері сөзсіз.
Санжар СҰЛТАНҒАЗЫ
