Еліміздегі барлық қалалар мен ауылдар 100 пайыз таза ауыз сумен қамтамасыз етілді, – деп хабарлайды 7-su.kz ақпараттық порталы.
Үкімет отырысында Өнеркәсіп және құрылыс вице-министрі Қуандық Қажкенов Мемлекет басшысының 2025 жылдың соңына дейін халықты ауыз сумен қамту жөніндегі маңызды тапсырмасының толық орындалғанын баяндады. Бұл мақсатқа республикалық бюджеттен 835 млрд теңге бөлініп, 1,6 мыңнан астам ауқымды жоба жүзеге асырылды. Айта кетерлігі, бұл қаржының 132 млрд теңгесі мемлекетке қайтарылған активтер есебінен бөлінген.
Жүргізілген жұмыстардың нәтижесінде еліміздің су инфрақұрылымы айтарлықтай жаңарды:
-
Қамту аясы: 90 қала мен 7,5 млн тұрғыны бар 6087 ауыл сапалы ауыз суға қол жеткізді.
-
Инфрақұрылым: 34 қала мен 756 ауыл орталықтандырылған су жүйесіне қосылса, 699 ауылда арнайы кешенді блок-модульдер орнатылды.
-
Желілерді жаңарту: Барлығы 9,5 мың шақырым магистральдық желі реконструкцияланды. Бұл желілердің тозу деңгейін 38 пайызға дейін төмендетуге мүмкіндік берді.
Қол жеткізген нәтижелерді сақтап қалу және коммуналдық инфрақұрылымды одан әрі дамыту жұмыстары тоқтамайды. 2026 жылға жалпы трансферттер аясында 128 млрд теңге қарастырылған. Оның ішінде:
-
Сумен жабдықтауға – 78 млрд теңге;
-
Су бұру жүйелеріне – 50 млрд теңге бағытталмақ.
Бұған қоса, «Энергетика мен коммуналдық секторды жаңғырту» ұлттық жобасы аясында несиелік қаражаттар есебінен қосымша жаңғырту жұмыстары жүргізіледі. Бұл қадамдар халықтың өмір сүру сапасын арттырып, әрбір шаңыраққа өркениет игілігін жеткізуді көздейді.
