Қазақстан 15-тен астам елге мал шаруашылығы өнімдерін экспорттап, жаңа нарықтарға шығу үшін ветеринариялық келісімдер мен хаттамаларды белсенді түрде пысықтап жатыр.
Отандық ауыл шаруашылығы тауарын өндірушілер мал шаруашылығы өнімдері бойынша әлемдік нарықтағы өз позициясын нығайтып келеді. Бүгінде Қазақстанның ауыл шаруашылығы өнімдері ЕАЭО, ЕО, ТМД мемлекеттері, Парсы шығанағы елдері, сондай-ақ Қытай, Корея, Жапония, Әзербайжан, Өзбекстан, Моңғолия секілді 15-тен астам елге жөнелтіледі.
Қытай Халық Республикасымен союға арналған ірі қара мал, тері, құс еті мен қосалқы өнімдерін экспорттау бойынша ветеринариялық хаттамаларға қол қойылған. Сонымен бірге қымыз, құрғақ бие сүті, термиялық өңделген өнімдер, салқындатылған сиыр, қой және шошқа етін жеткізу туралы келіссөздер жүріп жатыр. Сондай-ақ термиялық өңделген қой және серке еті, мұздатылған, салқындатылған және термиялық өңделген шошқа етін экспорттауға арналған хаттамалар да бекітілген.
Қазақстан Еуропалық Одаққа бал экспорттаушы елдер тізіміне енгізілді. Бұдан бөлек, ЕО нарығына қымыз бен балық шаруашылығы өнімдерін жеткізу бағыттары қарастырылуда.
Алғаш рет отандық 9 кәсіпорын Қытайдың азық-түлікке жатпайтын тауарлар тізіліміне енгізіліп, жаңа экспорттық мүмкіндіктерге жол ашты.
Иракпен союға арналған ірі қара және ұсақ мал экспортын реттейтін екі ветеринариялық сертификат нысаны келісілді. Грузиямен төрт сертификат бекітіліп, бұл елдің нарығына шығуға құқық берілді. Әзербайжанмен балық және ара шаруашылығы өнімдерін, Иранмен тұяқты жануарлардың терісін экспорттау бойынша құжаттар келісілді. БАӘ-ге спорттық жылқыларды жеткізуге дайындық жүріп жатыр, ал Ұлыбританияға ірі қара мал эмбриондарына қатысты сертификат жолданған.
Жапониямен (тірі жылқылар, бие және түйе сүті), Оңтүстік Кореямен (балмұздақ), Малайзиямен (сүт және ет өнімдері), сондай-ақ Бруней, Вьетнам, Таиланд, Сингапур, Катар, БАӘ және Босния және Герцеговина елдерімен жаңа экспорттық бағыттарды ашу жұмыстары жалғасуда.
Жалпы, шетелдік экспорттаушылар тізіліміне 3702 қазақстандық кәсіпорын енгізілген. Оның ішінде: ЕАЭО елдеріне – 3339, Қытайға – 57, ЕО елдеріне – 63, Өзбекстанға – 101, БАӘ-ге – 13, Иранға – 13, Жапонияға – 47, Түркияға – 16, Кореяға – 5, Сауд Арабиясына – 43, Әзербайжанға – 9 кәсіпорын тіркелген.
Беларусь, Ресей, Қытай, Армения және Түркия секілді бірқатар мемлекеттер Қазақстанның жекелеген өңірлерінде аусыл мен құс тұмауы тіркелуіне байланысты бұрын енгізілген уақытша шектеулерді алып тастады.
