Астанада ҚР Энергетика вице-министрі Санжар Жаркешов Қазақстандағы АҚШ-тың уақытша сенімді өкілі Дебора Робинсонмен кездесті. Тараптар энергетика саласындағы екіжақты ынтымақтастықтың стратегиялық маңызын атап өтті.
Санжар Жаркешов жаһандық энергетикалық қауіпсіздікті нығайтуға қосқан үлесі үшін АҚШ-қа алғыс білдіріп, Қазақстан мен АҚШ арасындағы тұрақты энергетикалық диалогтың маңыздылығын атап өтті.
Кездесуде «Chevron» және «ExxonMobil» компанияларымен жүзеге асырылып жатқан бірлескен жобаларға ерекше назар аударылды. Ынтымақтастық мұнай-газ кен орындарын игеру, геологиялық барлау, газ инфрақұрылымын кеңейту және өндірістік қуаттарды арттыру сияқты бағыттарды қамтиды.
Сонымен қатар, тараптар экспорттық-логистикалық мәселелерді және көмір өнеркәсібіндегі өзара іс-қимыл перспективаларын, соның ішінде көмір химиясын дамыту мүмкіндіктерін талқылады.
«Жетісу-Ақпарат»
