Speedtest Global Index қараша айындағы есеп беруі бойынша әлемдегі ең жүйрік интернеті бар елдер мен қалалардың тізімін жаңартты. Соңғы мәліметтерге сәйкес, Қазақстан мобильді интернет сапасы бойынша жақсы көрсеткіштер көрсетіп отыр, – деп хабарлайды 7-su.kz ақпараттық порталы Tengrinews.kz сайтына сілтеме жасап.
Мобильді интернет: Дамыған елдерден алдамыз
Мобильді интернет жылдамдығы бойынша Қазақстан әлемдік рейтингте бір сатыға төмендеп, 46-орынға тұрақтады. Еліміздегі орташа жүктеу жылдамдығы 93,07 Мбит/с құрады.
Қызықты дерек: бұл көрсеткіш бойынша Қазақстан технологиясы дамыған бірқатар елдерді, соның ішінде Жапонияны (62-орын, 65,14 Мбит/с) басып озды.
Әлемдік көшбасшылар:
-
БАӘ – 672,68 Мбит/с
-
Қатар – 542,56 Мбит/с
-
Кувейт – 398,66 Мбит/с
Кеңжолақты интернет: Әлі де артта қалушылық бар
Сымды (фиксирленген) интернет бойынша жағдай басқаша. Бұл санатта Қазақстан 91-орынға ие болды (орташа жылдамдық – 83,5 Мбит/с). Бұл бағытта Жапония едәуір алда келе жатыр – олар 23-ші сатыда (229,84 Мбит/с) орналасқан.
Қалалар рейтингі: Астана мен Алматының нәтижесі
Қалалар деңгейіндегі мобильді интернет жылдамдығы бойынша Қазақстанның қос мегаполисі алғашқы жүздікке енді:
-
Алматы – 63-орын (127,79 Мбит/с)
-
Астана – 67-орын (125,58 Мбит/с)
Бұл ретте де біздің қалалар Токиодан (90-орын, 80,44 Мбит/с) жылдамырақ интернетке ие болып отыр.
Елімізде 5G желісінің қарқынды енгізілуі мобильді интернет жылдамдығының артуына басты себеп болып отыр. Мамандар алдағы уақытта «Қолжетімді интернет» ұлттық жобасы аясында сымды интернет сапасы да жақсарады деп болжайды.
