Қазақстанның бірқатар өңірінде ауа райының құбылуына байланысты республикалық маңызы бар тасжолдарда қозғалыс режимі өзгерді, – деп хабарлайды 7-su.kz ақпараттық порталы.
«ҚазАвтоЖол» ұлттық компаниясының мәліметінше, Қарағанды облысындағы «Астана – Қарағанды – Алматы» тасжолының 92-164 шақырым аралығында (Анар станциясынан Теміртау қаласына дейін) жылдамдық шектеуі енгізілді. Мұнда көліктердің сағатына 140 км орнына 110 км жылдамдықпен жүруі тиіс. Бұл шара ауа райының нашарлауына байланысты қауіпсіздікті қамтамасыз ету үшін қабылданды.
Ал Ақмола облысында жағдай керісінше тұрақталды. «Астана – Көкшетау – Петропавл» бағытындағы жолдың 18-232 шақырымында жылдамдық режимі қайтадан 110 км деңгейіне көтерілді. Бұған дейін мұнда көліктерге сағатына 80 км жылдамдықтан аспау талап етілген еді.
Шығыс Қазақстан облысындағы Осинов асуында таулы жердің күрделі жағдайына байланысты «Өскемен – Алтай – Катонқарағай – Рахман қайнарлары» жолында тіркемесі бар жүк көліктері үшін шектеу әлі де күшінде. Бұл тыйым қыс маусымы аяқталғанша сақталады. Сондай-ақ Павлодар облысындағы «Қалқаман» айрығындағы жол өтпесінің зақымдануына байланысты Астана бағытына шығу және кентке кіру мүмкіндігі жабық тұр.
Синоптиктер еліміздің басым бөлігінде тұман түсіп, көктайғақ болып, жел күшейетінін ескертеді. Сондықтан жолға шықпас бұрын көліктің техникалық күйін тексеріп, жол ережесін қатаң сақтау маңызды. Сапар барысында 1403 байланыс орталығы арқылы жедел ақпарат алып отыруға болады.
