Қазақстанда денсаулығына байланысты көлік басқаруға медициналық қарсы көрсетілімі бар мыңдаған жүргізуші анықталды, – деп хабарлайды 7-su.kz ақпараттық порталы.
Денсаулық сақтау министрлігінің мәліметінше, ел бойынша 21 мыңнан астам жүргізушінің көлік басқаруға медициналық қарсы көрсетілімі бар.
Осыған байланысты полиция 13 мыңнан астам істі сотқа жолдаған. Заңды күшіне енген сот шешімдерінің негізінде 7 400 жүргізуші куәлігі жарамсыз деп танылды.
Оларға енді көлік құралын басқаруға тыйым салынады.
Атап айтқанда, эпилепсиямен ауыратын, екі көзі дұрыс көрмейтін, психикалық ауруы бар, сондай-ақ есірткі тектес заттарды қолданатын азаматтарға көлік басқаруға рұқсат етілмейді.
Көлік жүргізуге мүмкіндік бермейтін медициналық қарсы көрсетілімдердің тізімі Денсаулық сақтау министрлігінің тиісті бұйрығымен бекітілген.
