2026 жылға дейін пәтер бағасы 100%-ға дейін қымбаттауы мүмкін. Бұл болжамды сала сарапшылары алға тартып отыр, деп хабарлайды 7-su.kz ақпараттық порталы.
Бүгінде баспана – қазақстандықтар үшін басты әрі күрделі мәселенің бірі. Соңғы айларда тұрғын үй нарығындағы баға тағы да жоғарылай бастаған. Алдағы бір-екі жылда бұл өсім тіпті үдей түсуі ықтимал. Бағаның күрт қымбаттауына бірнеше заңнамалық және нарықтық өзгерістер себеп болуда.
1. Құрылыс компанияларына қойылған жаңа талаптар
2025 жылдың 1 тамызынан бастап құрылыс саласына бірқатар жаңа ережелер енгізіледі. Енді пәтерлерді бұрынғыдай қолма-қол ақшамен немесе алдын ала келісімшарт арқылы сату мүмкін болмайды. Барлық мәміле тек банк арқылы жүзеге асуы шарт.
Бұл – көлеңкелі экономиканың алдын алуға бағытталған қадам. Алайда құрылыс компаниялары банк арқылы түскен заңды табыс үшін салық төлеуге міндеттеледі. Нәтижесінде бұл қосымша шығын үй бағасына әсер етпей қоймайды.
Сонымен қатар құрылыс бастау үшін:
-
жер телімінің заңды құжаттары;
-
әкімдік рұқсаты;
-
сақтандыру немесе кепілдік келісімдері болуы тиіс.
Бұл да компаниялар үшін қосымша шығындар, ал сатып алушылар үшін – қымбат пәтерлер.
2. Жаңа Салық кодексі
2026 жылдан бастап күшіне енетін Салық кодексі құрылыс саласындағы салық жүктемесін арттырады. Жаңа ережелерге сәйкес, құрылыс компаниялары қосымша 16% салық төлейді. Бұл салықты да олар өз есебінен емес, тұтынушы есебінен өтейді.
Сарапшылардың айтуынша, бұл өзгеріс пәтер бағасын кем дегенде 16-20%-ға өсіреді. Бірінші нарықтағы (жаңа үйлер) бағаның қымбаттауы – екінші нарықтағы (қолданыста болған үйлер) бағаға да тікелей әсер етеді.
«Қазірдің өзінде жаңа үйлердің бағасы көтеріліп жатыр. Бұл автоматты түрде екінші нарыққа да әсер етеді. Себебі қолданыстағы үйлердің құны жаңа үйлерге қарап белгіленеді,» – дейді сарапшы Рүстем Ермекбаев.
Екінші деңгейлі банктер – Bank CenterCredit пен ForteBank – екінші нарықты жандандыру мақсатында тұрғын үй жинақ жүйесін іске қосуды көздеп отыр. Бұл бағдарлама халық арасында сұранысты арттырып, бағаға тағы да қысым жасауы мүмкін.
Нарықтағы соңғы тенденциялар мен заңнамалық өзгерістер баспана бағасының алдағы уақытта арзандауы екіталай екенін көрсетіп отыр. Сарапшылар бұл мәселені кейінге қалдырмай, жылжымайтын мүлікке
Нарықтағы соңғы тенденциялар мен заңнамалық өзгерістер баспана бағасының алдағы уақытта арзандауы екіталай екенін көрсетіп отыр. Сарапшылар бұл мәселені кейінге қалдырмай, жылжымайтын мүлікке инвестиция жасауды кешіктірмеуге кеңес береді.
«Баспана бағасы шын мәнінде өсіп жатыр және алдағы бір-екі жылда одан сайын қымбаттайды. Сондықтан шешімді ұзаққа созбаған жөн,» – дейді сарапшы Рүстем Ермекбаев.
