Қаржы министрлігі шенеуніктердің телефон арқылы сөйлесу әдебіне қатысты жаңа талаптарды бекітті, деп хабарлайды 7-su.kz желілік басылымы 31 арнаның Информбюро жаңалықтар қызметіне сілтеме жасап.
Жаңа қағидаға сәйкес, мемлекеттік қызметкерлер телефон тұтқасын үш қоңырауға дейін көтеруі тиіс. Әңгіме барысында сыпайылық пен сабыр сақтау – негізгі талаптардың бірі.
Сыпайылық – міндет, дауыс ырғағы – бақылауда
Министрліктің ресми мәліметінше, шенеуніктер қоңырауға жауап берген соң бірден амандасып, қойылған сұраққа нақты әрі сыпайы жауап беруі қажет.
Сөйлесу кезінде айғайлауға, ашулануға және дөрекі сөйлеуге қатаң тыйым салынады. Сонымен қатар, дауыс ырғағының жағымды болуы да – қызметкер әдебінің бір бөлігі ретінде қарастырылады.
Талапты бұзғандар тәртіптік жазаға тартылады
Ережелерді сақтамаған мамандар тәртіптік жауапкершілікке тартылуы мүмкін. Бұл туралы Қаржы министрлігінің әдеп жөніндегі уәкілі Камшат Арыстанбекова мәлімдеді:
“Осы әдеп кодексінің нормаларының бұзылуы тәртіптік жауаптылыққа әкеп соғады. Бұл жауаптылық белгілі болған кезде Қаржы министрлігінің ведомстволық бақылау қызметімен тергеу жүргізіледі. Қызметтік тергеу нәтижесінде теріс қылық нақты анықталса, тәртіптік комиссия шешімімен мемлекеттік қызметкерлерге жаза қолданылады”, – деді ол.
Жаңа талаптар мемлекеттік қызмет көрсету сапасын арттыруды және халықпен ашық, мәдениетті қарым-қатынас орнатуды мақсат етеді.
Фото: ria.ru
