Жастардың бір бөлігі дүркіреген тойдан бастартты. Олар жиналған миллиондаған қаржыны баспана алуға, жеке кәсіп ашуға және өзге де ұзақ мерзімді мақсаттарға бағыттауды құп көреді, – деп хабарлайды 7-su.kz ақпараттық порталы.
Соңғы жылдары елде шағын форматтағы отбасылық жиындарға сұраныс едәуір артты. Сәнден сәнге ауысқан бұл тренд жастардың қаржылық сауаттылығы өскенін айқын көрсетеді. Мамандардың пікірінше, бұл үрдіс жас отбасылардың болашағына нық сеніммен қарауына мүмкіндік береді.
Той ұйымдастырудағы ең үлкен шығынның бірі – қалыңдық көйлегі. Тіпті оны сатып алу, жалға алу немесе арнайы тіктірудің өзі қомақты қаражатты талап етеді. Сұранысқа қарай киімнің бағасы бірнеше жүз мың теңгеден басталып, миллиондаған теңгеге дейін барады.
«Бизнес салонымызда көйлектер бағасы 350 мың теңгеден 2 млн теңгеге дейін белгіленген. Жалға беру құны 150-600 мың теңге төңірегінде. Барлығы брендке, матаның сапасы мен жеткізілуіне байланысты», – дейді той салонының директоры Гүлзат Дүйсембаева.
Десек те, мейрамхана, фотограф, видеограф, залды безендіру және жүргізуші сияқты қызметтердің қымбаттығына қарамастан, кейбір жастар артық шығынды қысқартуды ұйғарған.
Осындай батыл қадамға барғандардың бірі – Мадина Елтаева. Олар жубайымен бірге шағын қуаныш өткізген. Мейрамханада бір адамның орыны 5 мың теңге болса, көйлек платформадан 20 мың теңгеге табылған.
«Барлық шығын 320 мың теңгені құрады. Оған мейрамхана, көйлек пен торт кірді. Ал туысқандарымыз бен достарымыз түсірілім мен жүргізушілік қызметті сыйға тартты. Үнемделген қаржының арқасында қолма-қол ақшаға алғашқы баспанамызды алдық. Қазір үйді кеңейтіп, 3 жеке кәсіп жүргізіп отырмыз», – дейді Мадина.
Еліміздің тағы бір тұрғыны Аяжан да 7 млн теңге кететін салтанатты тоқтатып, қаржыны үй алуға бағыттаған. Жастар тек жақын жақындарының басын қосып, неке қию мәселесін шешкен.
Жаз айларында мейрамханаларда бір адамға шаққандағы құн 20-40 мың теңге аралығында құбылады. Соған қарамастан, үлкен залда 200-250 адамға емес, 50-150 адамға арналған ықшам форматты таңдайтындар көбейген.
