Ұлттық статистика бюросы қазақстандықтардың ұйқыға, жұмысқа, тамаққа және демалысқа қанша уақыт жұмсайтынын есептеп көрді, деп хабарлайды 7-su.kz.
Ұлттық статистика бюросы 10 жастан асқан азаматтардың уақытты қалай пайдаланатынына талдау жасап, бір тәуліктің орташа үлесін есептеп шықты. Нәтижесінде, еліміздегі тұрғындар күнінің 54,2 пайызын, яғни 13 сағатын жеке күтімге арнайтыны белгілі болды. Оның ішінде:
-
Ұйқыға – 9 сағат 26 минут,
-
Тамақ ішу мен сусын тұтынуға – 1 сағат 57 минут,
-
Жеке гигиена мен күтімге – 1 сағат 27 минут жұмсалады.
Жұмысқа, үй шаруасына және бос уақытқа бөлінетін уақыт:
-
Жұмыс – 2 сағат 56 минут (тәуліктің 12,2%-ы),
-
Үй шаруасы – 3 сағат 14 минут (13,5%),
-
Оқу – 28 минут (2%),
-
Жеке қажетке тауар өндіру – 12 минут (0,8%),
-
Бос уақыт – 4 сағат 9 минут (17,3%).
Ерлер мен әйелдердің уақытты бөлуі де әртүрлі. Жұмыспен қамтылған ер азаматтар жұмысқа орта есеппен 9 сағат 7 минут жұмсаса, әйелдер – 7 сағат 57 минут еңбек етеді. Демек, бос уақытқа ерлерде 2 сағат 31 минут, әйелдерде 1 сағат 50 минут қалады.
Айта кетейік, мұндай зерттеу әр алты жыл сайын өткізіледі және ол халықтың өмір салтын, еңбек пен демалыс арасындағы тепе-теңдікті зерттеуге мүмкіндік береді.
