«Қилы-қилы заман болар, қарағай басын шортан шалар» деп қазақ қалай дәл тауып айтқан?! Асылында, бабаларымыздың мұнысы адамзат баласының азғынға айналып, азып-тозуын шамалағаны шығар. Кешегі текті қазақтың тұқымы бүгіндері туғанынан теріс айналып, тексізденіп бара жатқанын бағамдағаны болар. Одан бөлек, осы қазекең тағы «көресіңді көрмей көрге кірмейсің» дейді. Мұнысы тіпті рас. Көретінді бәріміз көріп келеміз. «Не көріп келеміз?» дейсіз ғой. Ендеше, өз ағайынынан айнып ат-құйрығын кесіскен айналадағы адамдарға қараңыз. Ең сорақысы, қаршадай ғана қыздарды қорлаған қанішер көбейгенін көріңіз. Ең қорқыныштысы, осының бәріне етіміз үйреніп кеткенін қосыңыз.
Жалт еткен жаман жаңалықтарды естіп жүрегіміз шайлығып қалғаны жалған емес. Қай кезде болмасын, еліміздің түкпір-түкпірінде азғындардың шыққаны, онымен қоймай олардың күннен күнге көбейіп келе жатқаны көңілге кірбің ұялатады.
Әлеуметтік желіні ашып қалсақ: «Педофил 5 жасар қызды зорлады», «7 жасар қызды қорлап, өлтіріп кеткен», «45 жастағы ер азамат бастауыш сынып оқушысына сексуалдық сипатта зорлық-зомбылық көрсетті», «Туған ағасы бірнеше жылдан бері зорлап келген», «Өгей әкесінен жүкті қыз» деген секілді көптеген аты жаман ақпаратқа куә боламыз. Өкініштісі, өгей қызын былай қойып, өз әкесі туған қызымен қосылған жағдайлар да орын алуда. Жайшылықта жылқы мінезді қазақпыз дегенде бәледейміз, сол жылқы екеш жылқы да өз енесіне шауып, өз төліне артылмағанынан сабақ алмағанымыз ба? Міне, осыдан-ақ адамзаттың ақыры басталып келе жатқанын байқау қиынға соқпайды.
Педофилдердің баратын жері темір тор болғанымен олардан қорлық көріп, жапа шеккен қаракөз қарындастарымыздың келешегі қандай болмақ?! Әлбетте, зорлықтың көкесін көрген балауса қыздар психологиясында ақауы бар, болашағы бұлыңғыр, өз-өзіне сенімсіз, көлеңкесінен үріккен, бәрінен көңілі қалған, ешкімге сенбейтін болып бойжетпей ме?! Ал әлгі «балаларға махаббаты» оянатын Құдай атқырлар темір торға барып, бірнеше жылдан кейін (егер өмірбойына бас бостандығынан айырылмаған болса) қамаудан қайта шығады. Десе де, елімізде әлі де педофилия дерті ушығып тұр. Бітпейтін бала зорлағыштар қайдан шығып жатыр?! Бұған тоқтам қоятын біреу бар ма?! Қазақ қоғамының аспанын торлаған осы бір қара бұлттан қашан құтылар екенбіз?..
Қарапайым ғана отбасында орын алған ұрыс-керістің өзі бүлдіршіндердің жүйке жүйесіне көптеген зақым келтіріп, залалы мен зиянын тигізеді. Үйден жылу таппаған қызғалдақтар әркімнің жылы сөзіне ергіш, алдағанына сенгіш келеді. Осыны пайдалана білетін «азғындар» айлакерлігімен кішкентайларды алдап, ойына келгенін істейді. Осындайда немістің философы Людвиг Витгенштейннің: «Бала ересектерге сенгендіктен барып көп нəрсе үйренеді, көп нәрседен зардап шегеді» дегені еске түседі.
Санжар СҰЛТАНҒАЗЫ
