Өткен жылдың аяғында «Жетісу Қазқұрылыс сервис» ЖШС күрделі жөндеу жұмыстарын өз қолдарына алып, айналасы жарты жылда апатты жағдайдағы Сарыбел ауылдық амбулатория ғимаратын жаңартып, қалпына келтірді.
Қазір жаңартылған Сарыбел ауылдық дәрігерлік амбулаториясының құрамында округке қарасты Садыр, Тұрпан ауылдарындағы екі ФАП бар. Садыр ауылында фельдшерлік-акушерлік пункт салынып, жақында пайдалануға берілмекші. Сарыбел ауылдық дәрігерлік амбулаториясы мен қос ФАП-та жалпы 20 медицина қызметкері еңбек етеді. Олардың арасында фельдшер-акушер, терапевт-дәрігер, ем жасайтын медбикелер Сарыбел ауылдық округінде тұратын 5 мыңнан астам адамға қалтқысыз қызмет етіп келеді. Олар шалғайда тұратын малшыларды әр екі айда бір мәрте аралап, олардың отбасының ауру-сырқаудан амандығын қадағалап тұрады.
Мереке күні тура осындай қуанышты оқиға Үшарал ауылында да жүз берді. Ауылда күніне 50 адам қабылдайтын қауқары бар амбулатория ғимаратына өткен жылдың қараша айында күрделі жөндеу жұмыстары басталған. Құрылыс жұмыстарын атқарған «Жетісу Қазқұрылыс сервис» ЖШС күрделі жөндеу жұмыстарына бөлінген 424 миллион теңгені тиімді игеріп, ауыл амбулаториясының ғимаратын жаңартты.
Сарыбел, Үшарал ауылдарындағы дәрігерлік амбулатория ғимараттарының ашылу салтанатына жиналған тұрғындар ауыл медицинасының қызмет көрсету сапасын жақсартуға айтарлықтай көмек көрсеткен облыс, аудан басшыларына алғыстарын жаудырды.
МЫРЗАҒАЛИ НҰРСЕЙІТ
