Мұның сыртында аймақ кәсіпкерлері мен өскен өңірлеріне жанашырлық танытатын қаржылы, жаны жомарт жандар да жергілікті тұрғындардың әлеуметтік жағдайының жақсара түсуіне өз үлесін қосуда. Жылдан жылға жаңа әлеуметтік нысандармен жасана бастаған Жаркент өңірінде тұрғындар тіршілігіне тегеурінді серпін беретін жаңа нысандар көбеюде. Әсіресе, соңғы 2 жылдан бері мұнда тұрғын үй құрылысы қарқын алып, жетім-жесірлер, көпбалалы отбасылар, мүгедек жандар жеңілдетілген кезекпен баспаналы болып жатса, қажетті қаржысын жинаған жас жанұялар «Отбасы банк» арқылы жанға жайлы тұрғын үйге қол жеткізуде.
Ауданда биыл 84,8 мың шаршы метр тұрғын үй пайдалануға берілді. Бұлардың 23,1 мың шаршы метрі бюджет есебінен, 17,3 мың шаршы метрі жеке кәсіпкерлер, 44,4 мың шаршы метрін тұрғындар салуда. Бюджет қаражаты есебінен 2,6 млрд. теңгеге салынған 60 пәтерлі 2 үй, 4,3 млрд. теңге жұмсалған 203 жеке тұрғын үй жақында 323 отбасына қолданысқа берілмек. Сондай-ақ, тұрғындарды сапалы ауызсумен қамтамасыз ету бағытында біраз жұмыс жүзеге асты.
Мәселен, 3 ауылдың жалпы 76,1 шақырымына сумен жабдықтау жүйесінің құрылысы мен қайта жаңғыртуға 1,3 млрд. теңге бөлініп, жыл соңына дейін Қырыққұдық, Шолақай ауыл тұрғындары сапалы ауызсумен қамтамасыз етіледі. Қазір ауданда тұрғындарды орталықтандырылған сумен қамту деңгейі 97,5 пайызды құрады. Керімағаш ауылындағы 8,4 шақырымдық су құбырын тартуға қаржы толық бөлінбегендіктен тиянақтау жұмыстары 2026 жылдың еншісіне қалдырылды. Жиделі ауылына 34,1 млн. теңгеге су дайындау жабдықтары орнатылды. Ауданның су құбыры мекемесіне 122,4 млн. теңгеге 2 экскаватор-тиегіш техникасын сатып алды.
Мырзағали Нұрсейіт
