Қазақстанның туристік тартымдылығы жаңа деңгейге көтеріліп, биылғы 9 айдың қорытындысы бойынша елге келген шетелдіктер саны 12,1 млн. адамнан асты, – деп хабарлайды 7-su.kz ақпараттық порталы.
Бұл көрсеткіш өткен жылдың сәйкес кезеңімен салыстырғанда 730 мың адамға көп. Ресми деректерге сүйенсек, келген қонақтардың 8,6 млн-ы елімізде бір тәуліктен артық уақыт өткізіп, нағыз турист ретінде тіркелген. Сондай-ақ ішкі туризм де қарқынды дамып, 6,7 млн отандасымыз ел ішінде саяхаттауды жөн көрген.
Шетелдік қонақтар қай елдерден жиі келеді?
Биыл ТМД-дан тыс елдердің, әсіресе Азия мен Еуропа туристерінің қызығушылығы ерекше артқан. ТОП-5 елдің тізімі мынадай:
-
Қытай: 693 мың адам (өсім 42%). Визасыз режим мен жаңа әуе рейстері басты себеп болды.
-
Үндістан: 113 мың адам. Былтырғы 106 мыңдық межеден асып түсті.
-
Түркия: 103 мың адам. Іскерлік және мәдени байланыстар туристер ағынын тұрақтандырды.
-
Германия: 81 мың адам. Еуропалықтарды негізінен этнотуризм мен табиғатымыз қызықтырады.
-
Оңтүстік Корея: 41,3 мың адам (өсім 25%).
Туристер таңдаған үздік бағыттар
eQonaq жүйесінің мәліметінше, шетелдіктер көбіне ірі мегаполистер мен табиғаты әсем өңірлерді таңдайды. Тізімде Алматы мен Астана қалалары көш бастап тұр. Сонымен қатар Атырау, Маңғыстау және Шығыс Қазақстан облыстары да танымал бағыттар қатарында.
Шет елден келген саяхатшылар тек қонақүйлерде ғана емес, алыс ауылдардағы этно-ауылдарда тоқтап, қазақ халқының салт-дәстүрімен танысуға ниетті. Тіпті, кейбір шетелдіктер Қазақстанның жайлы атмосферасына бауралып, осында біржола қалуды ұйғарып жатыр. Мәселен, америкалық Франсуа Марк Көкшетаудың табиғатына ғашық болып, сонда қоныс тепкен.
