Дүниежүзілік қоршаған ортаны қорғау күні және Қазақстандағы Эколог күніне орай мектеп оқушылары арасында Qyzyl Book Art: Дала қазынасы республикалық сурет байқауына өтінім қабылдау басталды, – деп хабарлайды 7-su.kz ақпараттық порталы.
Аталған жоба Қызыл кітапқа енген жануарлар мен өсімдіктер тақырыбына арналып, табиғатты қорғау мәселесіне балалар мен жасөспірімдердің назарын аударуды көздейді. Креативті индустрияларды дамыту қоры ұйымдастырып отырған бұл шара жас ұрпақтың қоршаған ортаға деген жауапкершілігін арттырудың тамаша үлгісі саналады. Экологиялық өзекті мәселелерді тек айтып қана қоймай, оны өнер арқылы шешуге талпыну – қоғамда оң өзгерістер қалыптастырудың тиімді жолы.
Жобаның басты ерекшелігі – еліміздің барлық өңірінен, соның ішінде Жетісу аймағынан да 1-11 немесе 12 сынып оқушылары қатыса алады. Ұйымдастырушылар үміткерлерді үш жас санаты бойынша бөліп қарастырады: 1-4 сынып, 5-8 сынып және 9-11 сынып аралығы. Балалардың цифрлық сауаттылығы мен шығармашылық еркіндігін қолдау мақсатында байқауға заманауи, Street Art және эксперименталды бағыттардағы жұмыстар қабылданады.
Қатысушы Қызыл кітапқа енген бір жануарды немесе өсімдікті таңдап, оның бейнесін өз туындысында көркем түрде ұсынуы қажет. Сурет таңдалған өсімдік не жануардың табиғаттағы рөлін, ерекшелігін, мекен ету ортасын және оны сақтаудың маңызын көрсетуі тиіс. Бұған қоса, «Неліктен мен дәл осы түрді таңдадым және оның болашақ ұрпақ үшін маңызы қандай?» деген сұраққа жауап беретін 500 таңбаға дейінгі қысқаша эссе қоса жолданады. Бұл шарт мектеп оқушыларының зерттеу қабілетін дамытып, экологиялық сауаттылығын тереңдетуге ықпал етеді.
Жас суретшілердің еңбегін кәсіби суретшілер, иллюстраторлар мен салалық мамандардан құралған сарапшылар комиссиясы бағалайды. Оған қоса, көпшіліктің қатысуын қамтамасыз ету үшін «Халық таңдауы» номинациясы бойынша ашық онлайн дауыс беру ұйымдастырылады. Сондай-ақ «Үздік экологиялық үндеу», «Үздік көркем шешім», «Үздік цифрлық туынды», «Ең жас талант» сияқты арнайы номинациялар тағайындалған.
Байқау қорытындысы бойынша ең үздік жұмыстар жинақталып, Қазақстанның Қызыл кітабына енген жануарлар мен өсімдіктерге арналған арнайы арт-кітап жарық көреді. Егер сіздің де балаңыздың бойында сурет салуға деген құштарлық болса, бұл мүмкіндікті жіберіп алмаңыздар. Бақ сынап, өз туындыңызды әлемге танытыңыз! Өтінімдерді қабылдау 2026 жылғы 5 маусым мен 27 шілде аралығында жүргізіледі.
Қатысу үшін төмендегі қарапайым қадамдарды орындау қажет:
-
Туындыны Instagram, TikTok, Facebook, Threads немесе X әлеуметтік желілерінің бірінде жариялаңыз. Жарияланымда қатысушы туралы ақпарат көрсетіліп, #DalaQazynasy және #QazaqCreative хэштегтері, сондай-ақ @qazaqcreative парақшасы белгіленуі шарт.
-
Ұйымдастырушылар ұсынған арнайы онлайн сілтеме арқылы өтінім толтырып, суреттің файлын, қысқаша эссені және әлеуметтік желідегі жарияланымға сілтемені жолдаңыз.
