Қарасай ауданының Көксай ауылында қойма өртенді. Бұл туралы «Жетісу» газеті Алматы облысының төтенше жағдайлар департаментіне сілтеме жасап хабарлады.
Бүгін сағат 10:00-де кезекші байланыс пультіне Қарасай ауданының Көксай ауылында, Наурызбай батыр көшесі №92 «А» мекенжайында «Әмір» шаруа қожалығының қоймасы өртенгені туралы хабарлама келіп түсті.
Өрт сөндірушілер оқиға орнына келіп, қойма ішінде құрылыс материалдары, ауыл шаруашылығы техникалары мен шиналар жанып жатқанын анықтады. Өрт шамамен 250 шаршы метр аумаққа жайылған.
Қаскелең қаласының өрт сөндіру бөлімінен шақыру орнына дейінгі қашықтық 18 километрді құрады. Автомобильдердің көптігі мен кептеліске байланысты кедергілер туындап, өрт сөндірушілер оқиға орнына сағат 10:33-те келді.
Өрт сағат 10:50-де ауыздықталды. Өрттің шығу себебі анықталуда. Құрбандар мен зардап шеккендер жоқ. Өрт сөндіруге Алматы облысы мен Алматы қаласы төтенше жағдайлар департаментінен 26 қызметкер мен 5 техника жұмылдырылды.
«ЖЕТІСУ-АҚПАРАТ»
