Жетісу жеріне арнайы жұмыс сапарымен келген Денсаулық сақтау министрінің бірінші вице-министрі Тимур Сұлтанғазиев облыстық көпсалалы балалар ауруханасына барып, ондағы бөлімдердің жұмысымен және еңбек ұжымымен танысты. Мұнда жылына облыстың шалғай аудандарынан келетін мыңдаған бала ем алады.
Астаналық қонаққа аурухананың жұмысын таныстырған директор Қайрат Оспанғалиев 10 жыл бұрын салынған емханаға күрделі жөндеу қажеттігін ескертіп, жаңарту, жаңғырту жұмыстарына ұсыныс беріп қойғандарын жеткізді. Соған орай Денсаулық сақтау министрлігі тарапынан қолдау керек.
Облыстық балалар ауруханасының ұжымына көмек берілетінін, ол үшін жобаны мемлекеттік бағдарламаға қосу қажеттігін, сол арқылы кішкентай пациенттерге лайықты жағдай жасалатынын атап өткен Тимур Сұлтанғазиев одан соң Кербұлақ аудандық орталық ауруханасының жұмысымен танысу үшін жолға шықты.
2023 жылы пайдалануға берілген емхана 75 орынды және күніне 250 адамды қабылдай алады. Құны 3 миллиард теңгеден астам қаржыға бағаланған жобаны «AK Construction Company» компаниясы ел игілігіне ұсынған. Хирургиялық, терапиялық, акушерлік, педиатрия, заманауи УЗИ орнатылған диагностика бөлімдері жұмыс істейтін аурухана сандық рентгенмен, зертханалармен, телемедициналық бағдарламамен, оттегімен қамтамасыз ету жүйесімен және заманауи жансақтау құрылғыларымен қамтылған. Медициналық мекеменің жұмысымен танысқан Денсаулық сақтау министрінің бірінші орынбасары кабинеттерді, стационар мен диагностикалық орталықты аралап, дәрігерлермен және науқастармен әңгімелесті. Жиын соңында орталық аурухананың жұмысына оң баға беріп, медициналық көмек пен техникалық қамсыздандыруға жаңаша көзқарас қажеттігін атап өтті.
Тимур Сұлтанғазиевпен кездесу кезінде «ми ісігі» диагнозы қойылған баланың анасы, Сарыөзек кентінің тұрғыны Гүлмира Жаңатаева өз ісіне немқұрайды қарайтын медицина қызметкерлерінің ісіне реніш білдірді.
– Біз тексеруден өтіп жатқанбыз, бірақ үйімізге қайтару жиілеп кетті. Ешқандай нақты себеп жоқ. Соның кесірінен ұлымның жағдайы нашарлап барады, – деген тұрғынның ренішін бірден назарға алған вице-министр:
– Бұл мәселені мен жеке бақылауыма аламын. Мұндай қарым-қатынас жақсы емес. Бала деген біздің жауапкершілігімізде. Соған орай әрбір науқасқа сапалы әрі адами тұрғыдан көмек көрсетуіміз керек, – деп аудандық орталық аурухананың директоры Қанат Әбдірахмановқа мекемеде қызметтік тексеру жүргізуді, мамандарға түсіндірме жұмыстарын өткізуді тапсырып, денсаулық сақтау саласына деген сенімсіздікті сейілтуді сөзбен емес, іспен көрсету керектігін ескертті.
Денсаулық сақтау министрінің бірінші орынбасары Тимур Сұлтанғазиевтің іссапары Жетісу өңірінің маңыздылығынан хабар берсе керек.
М. Әсетұлы
Фото: gkb-31.ru
