Саялы Сарқан ауданында дәнді дақылдарды жинау науқаны қарқынды жүргізілуде. Нәтижесінде қамбаға 95 мың тоннадан аса астық түсті.
Жалпы, өңірде егістіктің көлемі 97 мың гектардан асады. Оның 64 907 гектары дәнді дақылдарға тиесілі. Аптап ыстыққа қарамастан егістік жинау науқаны кесте бойынша жүріп, жиналуға жататын 64 мың гектардан аса дәнді дақылдың 50 мыңнан астам гектары жиналып, одан 95 мың тоннадан аса астық қамбаға түсті. Оның ішінде 9,6 мың тонна жаздық бидай, 28,7 мың тонна күздік бидай, бар. Қалғанын арпа дақылы құрайды.
– Күзгі егін жинау науқаны қыза түсті. Қазір өңірде 980 гектар алқапқа егілген картоптың 694 гектарынан 15 мың тонна өнім жиналып, 660 гектар көкөніс түрлерінің 522 гектарынан 16,5 мың тонна өнім алынды. Ал бақша дақылдары толық жиналып, 3 600 тонна өнім қамбаға құйылды. Күзгі дала жұмыстарына «Gos Agro» бағдарламасы негізінде 1476,13 тонна кепілдендірілген дизель отынын алуға аудан шаруа қожалықтарымен келісімшарт жасалуда, – дейді аудандық ауыл шаруашылығы бөлімінің басшысы Жандос Өмірсадық.
Өңір шаруалары жаз бойы маңдай терін тамшылатып жүріп күтіп-баптаған астықты шашау шығармай орып, қамбаға құюдың қамында жүр. Өнім жинау әлі де жалғасуда.
Жақсылық ЖОМАРТҰЛЫ
Сарқан ауданы
