«Жасыл энергетиканы» одан әрі дамытуға және өзімізде өндірілетін электр энергиясы көлемін ұлғайтуға облыстың табиғи-климаттық жағдайы өте қолайлы. Осы орайда облыста жаңартылған энергия көздерінің төртеуі Сарқан ауданы аумағында орналасқан. Басқан өзенінде, Екіаша ауылы маңында орналасқан шағын гидроэлектростансының бірінде болып, жұмыс барысымен танысып қайттық.
«ГеологСтрой» жауапкершілігі шектеулі серіктестігінің жоба жетекшісі Алий Карабалин «Baskan Power» ЖШС-нің 10.6 МВт болатын «Басқан ГЭС-2» және 4,3 МВт болатын «Басқан ГЭС-3» жұмысымен таныстырды. Оның айтуынша, электр қуатының өндірісі жыл сайын артып келеді. Су электр стансысын басқару жүйесі тұтастай автоматтандырылған. Нысандар заманауи құрылғылармен толықтай жабдықталған.
«Baskan Power» ЖШС-інде шамамен 90 адам жұмыс істейді. Олардың барлығы – жергілікті тұрғындар. Соның бірі – күзет қызметінің басшысы Қанат Қаймақбаев. Ол: «Ауылдағы ағайын үшін жұмыс көзі ашылғаны үлкен қуаныш. Осы уақытқа дейін такси жүргізушісі болып еңбек етіп жүрдім. Үйдегі азын-аулақ малды да бағып, қақтық. Күн ұзақ көлік тізгіндеу де оңай емес. Солай жүргенде алыстан емес, дәл ауылдан жұмыс та табыла кетті. Нысанды күзету үшін ауысыммен 12 ауылдасым жұмысқа тартылды. Еңбекақымызды уақытында аламыз. Ешқандай қиындық жоқ. Тек жауапкершілікпен өзімізге жүктелген жұмысты істесек болғаны. Ең бастысы – еліміз тыныш болсын», – деді.
Екіаша ауылдық округінің әкімі Дәулет Дюсенбековтің айтуынша, ауылда 3 мыңға жуық тұрғын бар. Елді мекен халқы негізінен егін салып, мал өсіреді. ГЭС жұмысын бастағалы жергілікті азаматтар тұрақты жұмысқа орналасып, табыс тауып отыр. Аталған гидроэлектрстансы маңайдағы бірнеше елді мекенді электр қуатымен қамтамасыз етеді. Инвестор компания «Baskan Power» ЖШС өз қаражатына елді мекенге бау-бақшалық су жеткізетін «Әлімбай», «Қайран» каналдарының 37 шақырымын жаңғыртып, 7 шақырым ауылішілік жолға жөндеу жұмыстарын жүргізген. Үнемі қайырымдылық шараларына атсалысып, ауылды көркейту ісіне де білек сыбана кіріскен жауапкершілігі шектеулі серіктестік басшылығына ауыл тұрғындары дән риза.
Еңлік Кенебай
Сарқан ауданы
