Аса көрнекті мемлекет және қоғам қайраткері, үш мәрте Социалистік Еңбек Ері, Қазақ ССР—нің ғылым академиясының академигі, техника ғылымдарының докторы, қазақ елінің біртуар азаматы Дінмұхамед Ахметұлы Қонаевтың туғанына 113 жыл.
Қазақ елі ардақты ұлын еске қалдыру мақсатында Дінмұхамед Ахметұлына жер жерде ескерткіштер қойылып, көшелердің аты берілуде. Алакөл ауданында да екі ескерткіш, бір орталық алаң, жеті көше және бір мектеп Қонаев атымен аталады.
Осыған орай, Үшарал қаласы, Д. Қонаев атындағы орталық алаңда орналасқан Дінмұхамед Ахметұлы Қонаевтың ескерткішіне гүл шоқтары қойылып, Үшарал қаласы фатиха мешітінің бас имамы Зархум Ербол дара тұлғаның рухына құран бағыштады.
Жиын барысында Үшарал қаласының әкімі М. Сайдильдинов Д. Қонаевтың туылған күнімен құттықтап, марқұмның ерең еңбегін сөз етті. Үшарал қалалық округінің аналар кеңесінің төрайымы Зайра Сайранова елі үшін тер төккен тұлғаның ерлігі мен өнегелі істерін еске алды.
«Жетісу-Ақпарат»
