Шерзат Полаттың өліміне қатысты қаралып жатқан сот отырысында марқұмның жақын туыстары – әжесі мен анасы денсаулығына байланысты сот залынан шығып, жедел жәрдемнің көмегіне жүгінуге мәжбүр болды.
Сот отырысы кезінде Шерзаттың әжесі Кадирова Жұмабике өзін жайсыз сезініп, күйзеліс әсерінен сот залынан ерте шықты. Оған жедел түрде медициналық көмек көрсетілді. Жедел жәрдем фельдшері Бауыржан Сакиповтың айтуынша:
«Жұмабике Кадированың жағдайы бірқалыпты. Қазір өміріне қауіп төніп тұрған жоқ, бірақ дәрігерлердің кеңесі бойынша ол сот отырысына қайта оралған жоқ.»
Арада көп уақыт өтпей, марқұмның анасы Гүлбахрам Болат та медициналық көмекті қажет етті. Оның қан қысымы көтеріліп, дереу дәрігер араласуы қажет болды. Қазіргі таңда жедел жәрдем қызметкерлері оның жағдайын бақылап отыр.
Тақырыпқа орай: Шерзат Полаттың өліміне қатысты соттың трансляциясы
Оқи отырыңыз: Шерзат Полат ісі: Адвокаттар соттың Алматыда өтуін сұрап отыр
Бұл оқиғалар отбасы үшін сот процесінің қаншалықты ауыр екенін тағы бір мәрте көрсетті. Эмоционалды күйзеліс пен ұзаққа созылған процестің туыстарға салмақ түсіріп жатқаны анық байқалады.
Еске сала кетейік, сот отырысы Ержан Жанұзақовтың төрағалығымен өтіп жатыр. Процесс ашық форматта өтуде. Қазіргі таңда 9 айыпталушыға қатысты тергеу жалғасуда. Сот Талдықорған қаласында бейсенбі және жұма күндері тұрақты түрде өткізіліп келеді.
«Жетісу-Ақпарат»
Фото. Жоғарғы сот
