Бүгін өткен сот процесінде Шерзат Полаттың өліміне қатысты бұрын-соңды айтылмаған жаңа деректер айтылды. Прокурор жариялаған мәліметтерге сүйенсек, қайғылы жағдай орын алған сәтте бірнеше адам дене жарақатын алған.
Тергеу материалдарына сәйкес, төбелес кезінде Шерзаттың әкесі Қаржаубай Нұрымов дүкен ішінен сыртқа шыққан сәтте, күдіктілердің бірі оның бетіне әйнек бөтелкемен соққы жасаған. Бұдан бөлек, Азамат Тоқтаубаев есімді азамат Нұрымовтың желке тұсынан таспен ұрғаны айтылды. Алайда бұл зат тергеу барысында нақты анықталмаған.
Оқиға кезінде Шерзаттың әжесі «Қамажай» дүкені жаққа бара жатқанда, Шынасыл есімді азамат жолын тосып, оны итеріп жіберіп, арыққа құлатқан. Бұл кезде жол бойында отырған Шерзатқа бармақшы болған анасының жолын Ілияс пен Шынасыл бөгеп, екі білегінен ұстап, тоқтатып қойған. Сот сараптамасы оның білектерінен көгерген іздерді анықтаған.
Айта кетейік, бұл іс бойынша сот тергеуі жалғасуда. Қайғылы оқиғаға байланысты күдіктілердің әрекеттеріне құқықтық баға берілмек.
«Жетісу-Ақпарат»
Фото. Жоғарғы сот
