Ұйғыр ауданының орталығы — Шонжы ауылында жеке тұрғын үй өртеніп, төрт адам көз жұмды. Оның ішінде екеуі 1-3 жасар сәби. Бұл туралы «Жетісу» газеті Алматы облысының төтенше жағдайлар департаментіне сілтеме жасап хабарлады.
Қайғылы оқиға 13 желтоқсан күні, таңғы сағат 5:40-та болған. Алматы облысының төтенше жағдайлар департаментіне Ұйғыр ауданының Шонжы ауылында уақытша тұрғын үй аумағында (времянка) өрт шыққаны туралы хабарлама келіп түскен соң, өрт сөндірушілер 5 минуттың ішінде жанып жатқан нысанға жеткен. Өртке қарсы қызметкерлер тұру үшін жалға берілетін тұрғын үй құрылысының (уақытша ғимараты) толық отқа оранғанын көреді.
Өрт сөндіру барысында оқиға орнынан төрт адамның мәйіті табылды, олар: 1992 жылы туған ер азамат, 1997 жылы туған жұбайы және 2017 және 2019 жылдары туған екі ұлы.
Өрт 06 сағат 09 минутта ауыздықталып, 06 сағат 45 минутта толық сөндірілді. Өрттің көлемі 40 шаршы метрді қамтыды. Өрттің себебі анықталуда. Өрттің себебін анықтау үшін оқиға орнына Алматы облысының Өрт-сынақ зертханасы жіберілді.
«ЖЕТІСУ-АҚПАРАТ»
