Алматы облысы, Талғар ауданындағы атышулы қылмыстық іс бойынша сот отырысы жалғасып жатыр. Бүгінгі процесте Талғар аудандық полиция басқармасының Криминалдық полиция бөлімінің бастығы Медет Әділжан куә ретінде жауап берді, деп хабарлайды 7-su.kz ақпараттық порталы.
Медет Әділжан сотта оқиға болған сәттен бастап қандай әрекеттер жасалғанын егжей-тегжейлі баяндады.
– Жедел кезекшіден хабарлама түскен соң бірден полиция басқармасына бардым. Оқиғаға байланысты қарамағымдағы қызметкерлерге нақты тапсырмалар беріп, дереу іске кірістік. Кейін оқиға орнына өзім де бардым. Барлығы алдын ала белгіленген жоспар бойынша жүргізілді, – деді ол.
Сотта сондай-ақ негізгі фигуранттардың бірі – Нұрқанат Ғайыпбаевтың тергеу кезінде берген жауабының бейнежазбасы көрсетілді. Видеода Ғайыпбаев өзіне және марқұм Шерзат Болатқа пышақ салып кеткен күдіктілерді суреттен танығанын айтады.
– Қолымызда бірнеше адамның фотосуреті болды. Ғайыпбаевтан күдіктілерді тани ма деп сұрадық. Ол “танимын” деп жауап берді. Суреттерді көрсеткенімізде, “мына азамат Шерзатты пышақтады, ал мына азамат мені жарақаттады” деп көрсетті, – деді Медет Әділжан.
Судья Ержан Жанұзақов күдіктілердің нақты кім екенін атауды сұрады. Жауап ретінде Әділжан:
– Ғайыпбаев Шерзат Болатты пышақтаған адам ретінде Шынасыл Абзалды, ал өзін жарақаттаған күдікті ретінде Тоқтаубаевты көрсетті. Екеуінің де фотосуреттерін танып, нақты көрсетті, – деп мәлімдеді.
Іс бойынша сот тергеуі жалғасып жатыр.
