<sknsh артериялық гипертония мен жүректің ишемиялық ауруын ерте анықтауға бағытталған скринингтік тексерулер аясында 1,7 млн адам қамтылды, – деп хабарлайды 7-su.kz ақпараттық порталы.
Жаппай жүргізілген тексерулердің нәтижесінде 114 мыңнан астам азаматта қанайналым жүйесінің сырқаттары бастапқы кезеңінде айқындалды. Медициналық қорытынды бойынша пациенттердің 99 мыңға жуығына артериялық гипертония, ал 15 мыңға жуығына жүректің ишемиялық ауруы диагнозы қойылды.
Скринингтік бағдарламаға 2025 жылдан бастап енгізілген заманауи әрі жоғары сезімтал диагностикалық әдістер дертті дәл анықтау деңгейін арттырды. Мұндай инновациялық тәсілдер емдеу шараларын дер кезінде бастауға жол ашады. Қазіргі таңда жүрек-қантамыр жүйесінде ақауы бар 1,9 млн адам дәрігерлердің тұрақты динамикалық бақылауында. Тұрақты медициналық тексеру, қауіпті факторларды жіті қадағалау және тиісті дәрі-дәрмекпен қамту асқынулардың алдын алуға септігін тигізеді.
Дүниежүзілік денсаулық сақтау ұйымының дерегінше, қанайналым жүйесі аурулары ғаламдық деңгейде өлімнің басты себептерінің бірі. Жыл сайын бұл дерт 19,8 млн адамның өмірін қиып, жалпы өлім-жітімнің 32% мөлшерін құрайды. Осы орайда скринингтік тексерулерден уақытылы өту өмір сүру сапасын сақтап қалудың тиімді құралына айналды.
Азаматтардың денсаулығын нығайту және жүрек-қантамыр ауруларының алдын алу – ұлттық денсаулық сақтау жүйесінің басым бағыты. Скринингтен өту арқылы әрбір адам өзінің денсаулық көрсеткіштерін біліп, аурудың алдын алуға мүмкіндік алады. Өзіңіздің және жақындарыңыздың денсаулығына бейжай қарамай, медициналық тексерулерді назардан тыс қалдырмаңыз.
