Үш қыз, бір ұл тәрбиелеп отырған Әлия Тастанованың «Қазпоштада» жұмыс істеп жүргеніне – 35 жыл! Бүгінде Кеген ауылындағы құрметті пошташы. Орташа есеппен алғанда ол күніне жеті шақырым жол жүреді. Бүгінде өзіне жүктелген учаскеде 9 ұйым және 500 тұрғын үй мен 10 көше бар.
Кейіпкеріміз бұл іске ойда жоқта келгенін айтады. Ол 1979 жылы Райымбек ауданы, Кеген ауылындағы Жаңабаев атындағы орта мектепті тәмамдап, есептік кредиттік техникумға оқуға түсіп, «банк ісі» мамандығы бойынша білім алды. Диплом алғаннан кейін бес жыл банк саласында қызмет істеді.
– Банк қызметкері болып жүргенімде ауыл пошташысы Күләш апа маған «Қазпоштаға» жұмысқа орналасу туралы ұсынысын айтты. Ол кезде ол кісі зейнетке шығуға дайындалып, өз учаскесін жауапты адамға тапсырмақшы еді. Мен бұл ұсынысқа уақытша ғана келіскен едім, бірақ кейін қарасам, ондаған жылдың қалай өткенін аңғармай қалыппын, – дейді кейіпкеріміз.
Әр адамның алғысын алу – жұмысты үстемелеп істеуге итермелейтін керемет сезім. Бұл – Әлия Бекмұратқызының күнделікті жұмысы. Өзінің айтуынша, әр газет-журналды, хат-хабарды жеткізгенде, тұрғындар алғысын айтып, қариясы бар үйден әңгіме тыңдап, әжесі бар үйден ақыл естіп шығады. Әр тұрғынға қуаныш сыйлау арқылы өзі де жан рақатына бөленеді. Қызметтегі қиындықты сұрағанымызда, әр істің жеңілі болмайтындығын, әркім өзіне ұнаған іспен айналысатынын айта келіп, өз ісіне махаббатпен қарағаннан болар, қиындықтың өзі қызыққа ұласып кететіндігін жеткізді. Пошташыны ауыл тұрғындарының бәрі біледі.
Бүгінде заман ағымы басқа арнаға бұрылды, бүгін керек деп тұрғаныңыз ертең көштен қалуы мүмкін. Зымыраған уақытта пошташы болудың да өз ерекшелігі бар. Бұл жөнінде Әлия Бекмұратқызы: «Поштаның өзі және оның инфрақұрылымы толықтай цифрландырылды. Пошташыларға смартфон мен велосипед береді. Қала мен аудан орталықтарында сәлемдемелер супермаркеті бар. Барлық бөліше, соның ішінде, ауылдық жерлерде бүгінде толықтай компьютерге көшті», – дейді. Қоғам қалай дамыса, соған орай қызметтің де мүмкіндіктерін, тетігін тауып отырған пошташылардың ісін ерлік деп қарау керек-ақ.
Біздің кейіпкер пошташылардың біліктілігін арттыру үшін өтетін оқудан тыс қалған емес. Өзі де: «Оқу курсы барлық жаңа жобаларды, бағдарламаларды және қызметтерді қамтиды. Пошташының білім деңгейі қазіргі заманғы талаптарға сай болуы керек. Сондықтан біз үнемі жаңа нәрселерді үйренеміз және ол маған ұнайды», – деп айтады.
Бүгінде мерзімдік басылымдарға жазылу науқаны бұрынғымен салыстырғанда төмендеді деген пікір бар. Алайда пошташы өзі тұратын ауылдағы жағдайдың керісінше болып жатқанын айтады.
– Мәселен, 2000 жылдары басылымдарға жазылу күрт төмендеп кетсе, қазір керсінше. Әсіресе, бүгінде балалар басылымына жазылатындар көбейді. Оны қалтафоннан баланы алыс ұстауға тырысатын ата-аналар жаздыртып алады. Түрлі-түсті газет-журналдардан балалар сурет салғанды, қағаздан небір бейнелерді кескенді ұнатады, ал компьютердегі ойындар мұндай мүмкіндік бермейді. Сонымен қатар, іскерлік хат-хабарлар саны да азайған жоқ. Біз тапсырыс хаттарын жеткіземіз. Сот орындаушылары, салық қызметі, зейнетақы қоры көптеген хаттарды жібереді. Хаттардың жазылуы азайып кетті деген ұғым дұрыс емес, тек олардың жеткізу құралы өзгерді, – дейді. Сөз арасында жеке хаттар да жиі жазылатындығын жеткізді. Мысалға, әскерден қыздарға, зейнеткерлер мен студенттер арасындағы, сондай-ақ, бір-бірін мерекемен құттықтаған алыстағы ағайындардың хаттары жиі поштаға келіп тұратындығын айтты.
Жылдың төрт мезгілінде дамылсыз хат-хабар, газет-журнал тарататын жандардың жалақысы жөнінде сұрағанымызда:
– Бір орында адам тұрақты жұмыс істесе, демек, оған жалақысы өзінің күнделікті қажеттілігіне жететіндігін және ұжымның ұйымшылдығын, жақсы екенін білдіреді. Мәселен, дәл қазір бізде бос жұмыс орны жоқ, – деп жауап қайырды.
Барлық жұмыс жақсы нәтиже беру үшін міндетті түрде кәсібіңді жақсы көруің керек. «Ал жақсы пошташы болу үшін адамдармен тез тіл табыса білу, шыдамдылық пен төзімділік, жанашырлық пен мейірімділік сынды қасиеттер де талап етіледі», – дейді мықты маман.
Айна СМАҒҰЛОВА,
«Қазпошта» АҚ Алматы облыстық филиалы сату бөлімінің бас маманы
