Күнделікті сүйіп ішетін сүт қосылған кофеңіз тістерге зиян тигізуі мүмкін. Британиялық стоматолог Найри Уитли сүт пен кофе қосындысының ауыз қуысы денсаулығына кері әсер ететінін мәлімдеді.
Бұл туралы Daily Mirror басылымына сілтеме жасап 7-su.kzхабарлайды.
Дәрігердің айтуынша, сүт пен кофе ауыздың сілемейлі қабығын кептіріп, жағымсыз иіс шығаруына жол ашады. Бұл процесс ауыз қуысындағы бактериялардың көбеюіне қолайлы жағдай туғызады. Сонымен қатар, күкіртті қосылыстардың бөлінуі де иістің нашарлауына әсер етеді.
Кофенің тағы бір зияны – оның қышқыл қасиеті. Ол тіс эмалін жұқартып, тістік өңездің (зубной налёт) пайда болуына себеп болады. Ал кофе ішерде оған қант немесе шәрбат қосатындар үшін жағдай тіпті қиындай түседі: бұл әрекет тісжегі мен басқа да стоматологиялық аурулардың даму қаупін арттырады.
Маман не ұсынады?
Доктор Уитли кофені сүтсіз әрі қантсыз тұтынуға кеңес береді. Күнделікті тұтыну мөлшерін 400 мл-ден асырмау қажет. Сондай-ақ, кофе ішкеннен кейін бірден емес, 30 минуттан соң тісіңізді жуу ұсынылады. Алғашқы қадам – ауыз қуысын таза сумен шаю: бұл қышқылды-сілтілік тепе-теңдікті қалпына келтіріп, зиянды қалдықтарды жоюға көмектеседі.
Тістеріңіз сау, тынысыңыз балғын болсын десеңіз, күнделікті әдеттерге назар аударып, сүтті кофені шектеулі мөлшерде тұтынған жөн.
Фото: pixabay.com
