Бейсен Құранбек атындағы Журналистер үйінің мәжіліс залында «Аймақтық журналистика және ЖИ: жаңа мүмкіндіктер терезесі» атты семинар өтті.
Іс-шараға ЖУ журналистика факультетінің студенттері мен аймақтық бұқаралық ақпарат құралдарының өкілдері қатысты.
Семинардың мақсаты – аймақтық журналистер мен болашақ медиа мамандарының жасанды интеллект құралдарын журналистика саласында тиімді қолдану қабілетін арттыру, цифрлық контент жасаудың заманауи тәсілдерімен таныстыру, жаңа технологиялардың ақпарат өндіру, өңдеу және таратудағы рөлін көрсету.
Шара барысында «Журналистика мен жасанды интеллект: жаңа мүмкіндіктер», «SMM және цифрлық сторителлинг», «Жасанды интеллект: әрбір қазақстандық үшін жаңа мүмкіндіктер дәуірі» тақырыптарында мазмұнды баяндамалар жасалды. Спикерлер заманауи ЖИ құралдарының көмегімен мәтін құрастыру, мәліметтерді талдау, фотосурет пен бейнематериалдарды өңдеу, визуализация жасау және фейкті анықтау жолдарын нақты мысалдар арқылы көрсетті.
Қатысушылар тәжірибелік бөлімде жасанды интеллект платформаларымен жұмыс істеп, қысқа мәтін жазу, тақырып ұсыну, әлеуметтік желіге арналған контент жоспарын жасау және визуалды материал әзірлеу бағытында практикалық тапсырмалар орындады.
Семинарды ШЖҚ «Жетісу Медиа» МКК ұйымдастырды. Шара соңында қатысушыларға жасанды интеллекттің аймақтық журналистиканы дамытудағы маңызы туралы жан-жақты ақпарат беріліп, жаңа білім мен тәжірибелік дағдылар қалыптасты.
«Бүгінгі семинар мен үшін өте пайдалы болды. Біз тек теория тыңдап қойған жоқпыз, нақты құралдармен жұмыс істеп көрдік. Жасанды интеллекттің журналистикада қаншалықты маңызды екенін түсіндім. Бұл – болашақ мамандар үшін үлкен мүмкіндік», – дейді семинарға қатысқан журналистика факультетінің студенті Ақбота Әділхан.
