«Қазсушар» кәсіпорны еліміздің 7 аймағында жалпы ұзындығы 2011 шақырым болатын каналдарды механикалық жолмен тазартуға кірісті. Бұл жұмыстар Алматы, Батыс Қазақстан, Шығыс Қазақстан, Жамбыл, Қызылорда, Түркістан және Жетісу облыстарында жүргізілуде.
Каналдарды тазарту олардың су өткізу мүмкіндігін жақсартып, диқандарды сумен тұрақты қамтамасыз етуге жағдай туғызады. Биыл «Қазсушар» филиалдары 12,7 млрд. текшеметр су жеткізу үшін диқандармен 27,8 мыңнан аса шарт жасауды көздеп отыр. Қазіргі таңда 11 700, ал былтыр шаруа қожалықтарымен 23 830 шарт жасалған.
Су ресустары және ирригация вице-министрі Ерболат Ибрайхановтың айтуынша, өткен жылы министрлік еліміздің оңтүстік аймағындағы диқандарды суармалы сумен толық қамтыған. Биыл да ведомство Орталық Азия елдерімен келіссөздер жүргізіпті. Нәтижесінде биылғы суару маусымында Сырдария өзені арқылы елімізге 3,7 млрд. текшеметр су келмек. Шу және Талас өзендерімен 600 млн. текшеметрден аса су жеткізіледі.
А. Байжұмақызы
