Қазақстанда әлеуметтік маңызы бар азық-түлік тауарларының бағасы 2025 жылдың алғашқы айларында тұрақтылығын сақтап келеді, деп хабарлайды 7-su.kz желілік басылымы.
Бюро деректеріне сүйенсек, жыл басынан бері бірқатар негізгі тауарлар бағасының төмендеуі тіркелген. Мәселен, халық тұтынатын басты өнімдердің бірі – жұмыртқа 3,0%-ға арзандаған. С1 санатындағы 10 дана жұмыртқаның орташа бағасы қаңтарда 548 теңге болса, сәуір айының ортасына қарай 531 теңгеге дейін түскен.
Аталған баға тұрақтылығы үкімет пен бизнестің бірлескен әрекеттерінің нәтижесі. Еске сала кетейік, ақпан айында Сауда және интеграция министрлігі, салалық қауымдастықтар мен сауда желілері арасында С1 санатындағы жұмыртқаның бір данасына ҚҚС есебімен 55 теңгеден аспайтын шекті бағасын белгілеу жөнінде меморандумға қол қойылған болатын. Келісім аясында қосымша сауда үстемелері де шектеліп отыр.
Бағасы төмендеген өзге де өнімдер қатарында:
Күріш – 4,7%-ға арзандады;
Ұн – 1,8%-ға төмендеді;
Қарақұмық жармасы – 0,3%-ға азайды.
Сонымен қатар сүзбе, күнбағыс майы және рожки сынды негізгі азық-түлік тауарлары бойынша баға тұрақты деңгейде сақталған. 8–15 сәуір аралығындағы апта ішінде бұл тауарлар бойынша бағаларда айтарлықтай өзгеріс болмаған немесе бар болғаны 0,1% көлемінде ғана ауытқу тіркелген.
Алайда көкөніс өнімдері бойынша, керісінше, бағаның маусымдық өсуі байқалады:
Қырыққабат – 3,5%-ға қымбаттаған;
Сәбіз – 1,6%;
Пияз – 1,8%;
Картоп – 1,7%-ға өскен.
Мамандар бұл өсімді маусымаралық кезеңмен және сақтау мен логистика шығындарының артуымен байланыстырып отыр. Дәстүрлі түрде көктем айларында көкөніс өнімдері нарығында белгілі бір тұрақсыздық орын алады.
Жалпы алғанда, азық-түлік нарығындағы тұрақтылықты сақтау үшін мемлекет пен сала өкілдері арасындағы ынтымақтастық жалғасып келеді. Бағаның реттелуі мен әлеуметтік маңызы бар тауарлардың қолжетімділігі алдағы кезеңдерде де бақылауда болмақ.
Фото: 7-su.kz/ Аяулым Шынгаева
