Бүгін Ұжымдық қауіпсіздік туралы шарт ұйымы (ҰҚШҰ) Қазақстаннан бітімгерлерді шығаруды бастайды.
«Ұйымның Бас хатшысы Станислав Зась 10 күн ішінде ұйым контингенті Қазақстаннан түгелдей кететінін мәлім етті. Бітімгерлердің жалпы саны — 2500 адам», — делінген «Қазақпаратқа» берілген ресми хабарламада.
Айта кетейік, Мемлекет басшысы Қасым-Жомарт Тоқаев 11 қаңтар күні Парламент палаталарының бірлескен отырысында Ұжымдық қауіпсіздік туралы шарт ұйымының жұмысына ерекше тоқталып өткен еді.
— Бұл ұйым ұжымдық қауіпсіздік мәселелерімен айналысады. Қазақстан – оның толыққанды құрылтайшысының бірі. Осы ұйымның барлық мүшелерінен жасақталған бітімгершілік контингенті Қазақстанға уақытша мерзімге ғана келді. Оған жүктелген міндеттер нақты айқындалған. Бұл – стратегиялық нысандарды күзету және ақыл-кеңес беріп, қолдау көрсету. Лаңкестерге қарсы операцияны толығымен Қазақстанның күштік құрылымдары жүзеге асыруда. Шын мәнінде, солардың жанкешті іс-әрекетінің арқасында төңкеріске жол берілген жоқ, — деген болатын Президент.
«ЖЕТІСУ-АҚПАРАТ»
