Жетісу жерінде жолаушы тасымалымен айналысатын «Жетісу» әуекомпаниясы» акционерлік қоғамына қарасты «Талдықорған – Үшарал» бағытында ұшатын «L-410» ұшақтарын енді жас мамандар басқарады. Туристік аймаққа бет алған жұртшылыққа қызмет көрсететін борт командирі арнайы сынақтан өтіп, әуежай басшылығының ықыласына бөленді.
«Жетісу» әуекомпаниясы» АҚ-ның президенті Қалмұхамет Дөңсебаевтың айтуынша, қос ұшақтың командирлігіне алынған Жақсылық Әлекеев пен Мирас Темірбеков есімді жас мамандардың әрқайсысы кем дегенде 3 мың сағаттық тәжірибеден өтіп, әуе кеңістігіндегі жолаушы тасымалына тұрақты қатысқан ұшқыштар.
– Бүгінгі ресми сынақ шарасы жастарды «L-410» ұшақтарының командирлігіне тағайындауға арналып отыр. Алматыдағы Азаматтық авиация академиясын бітірген екеуі де Чехияда білімін жетілдіріп, жаңа ұшақтың сырына қанықты деуге болады, – деген Қалмұхамет Жағыпарұлы жас мамандардың кәсібилігіне баға берді. – Содан кейін екі жылдай екінші ұшқыш қызметін атқарып, өздерінің біліктілігін танытты. Оларды сағаттық тәжірибесі толысқаннан кейін тағы екі ай дайындықтан өткізіп, ұшақ командирлігіне қабылдап отырмыз. Олардың екеуі де, міне, «Талдықорған – Үшарал» бағытында өздігінен ұшып, әуе кемесін қалай жүргізетінін көрсетті. Сондықтан жас ұшқыштардың қатарын толтырып отырған қос маманның болашағынан үлкен үміт күтеміз. Жалпы, әуежайдағы жас ұшқыштардың саны сегіз. Олардың бәрі де «Жетісу» әуекомпаниясы» АҚ-ның абыройы мен дәрежесін көтеріп, жолаушылардың қауіпсіздігін қамтамасыз етеді деп сенеміз. Биыл «Талдықорған – Үшарал» бағытында ұшуға ниет білдіргендердің саны өте көп. Мамыр айынан басталған жолаушы тасымалының бағасы 8 мың теңгеден болып отыр. Балалардан осы соманың тең жартысы алынады.
Ашылғанына 4 жыл толып отырған Үшарал әуежайының басшысы Әшірбек Болатбековтың айтуына қарағанда, Алакөл ауданына әуежай арқылы күніне 1 мыңға жуық жолаушы келіп, кетеді.
Мәди АЛЖАНБАЙ
Алматы облысы
