Жетісу облысының орталығында бәйге маусымының ашылуына байланысты «Талдықорған – 2025» атты ұлттық ат спорты түрлерінен арнайы жарыс өтті.
Жарыстың шымылдығын ашу салтанатында сөз алған Талдықорған қаласының әкімі Ернат Бәзіл шабандоздарға сәттілік тілеп, ізгі тілегін жеткізді. Осы орайда шаһар басшысы аймақта ұлттық спорт түрлерінің жылдан жылға дамып келе жатқанын айрықша атап өтті.
– Бүгін бәйге маусымын ресми түрде аштық. Ұлттық спортты дәріптеп, бабалар рухын ұлықтайтын бұл жарыстар маңызды дәстүр. Қатысушылардың дайындығы жоғары екендігін көрсетті. Бір қуантарлығы жастар арасында ат спорты түрлеріне қызығушылықтың жылдан жылға артып келе жатқаны анық байқалады. Барлықтарыңызға тек жеңіс тілеймін,– деді Ернат Дүйсенбекұлы.
Бұл жолғы көрермен қауымның делебесін қоздырып, тартымды да тамаша өткен дүбірлі ат жарысына еліміздің әр өңірінен 100-ден астам шабандоз қатысып, кіл мықтыларды анықтады. Олардың қатарында небір аламан жарыстарда ат құлағында ойнап, Жетісудың абыройын асқақтатып жүрген даңқты шабандоз Амангелді Хамза да бар.
Жарыс 7 шақырымға «Құнан», 18 шақырым қашықтықта бақ сынайтын «Аламан» бәйге болып екі кезең бойынша ұйымдастырылды. Жалпы жүлде қоры 4 млн теңге. Сонымен әр айналымда тұлпары шашасына шаң жұқтырмай қара үзіп шыққан «Құнан» бәйгеде І орын жүлдесін Уәлибек Шымырбаев жеңіп алса, «Аламан» жарыста бас жүлдені Абай облысынан келген Амир Сералы еншіледі.
Айдын КӘЛІМХАН
