Талдықорғандағы Seven дүкенінде болған оқыс оқиға әлеуметтік желіде қызу талқылануда.
Жеті жасар баланы Kaspi терминалынан тоқ соққан сәттің видеосы тарап, оны зардап шеккен баланың анасы Назым Адилова жариялады. Анасы бұл видео арқылы тұрғындарды сақ болуға шақырады.
Оқиға видеодан баланың дүкен кіреберісіндегі есікті ұстап, кейін оң қолын Kaspi терминалына тигізген сәтте оны тоқ ұрғаны анық көрінеді. Бақытына орай, баланы әйел құтқарып қалған. Назым Адилованың айтуынша, терминал маңында ашық сымдар болмаған, сырттан қарағанда бәрі қалыпты көрінген.
«Кеше менің ұлымды Kaspi терминалынан тоқ ұрды. Балам ауыр жарақат пен қатты қорқынышты бастан өткерді. Саусақтарында күйік, ауырсыну бар, денесі тырысып, құрысып қалды. Ол қатты шошып, психологиялық соққы алды. Мұндай жағдай ешкімнің басына түспесін!» – деді Назым Адилова.
7 жастағы бала қазір облыстық көпсалалы балалар ауруханасында ем алуда. Дәрігерлер оның жағдайын тұрақты деп бағалады. Толық диагноз тексерулерден кейін белгілі болады.
«Жұмаға дейін ауруханада боламыз. Абай болыңыздар, сақтықта қорлық жоқ!» – деп ескертті анасы.
Талдықорғанның денсаулық сақтау басқармасы баланың ауруханада екенін растады: «Жағдайы тұрақты. Қосымша ақпарат ата-анасының рұқсатынсыз берілмейді», — деді.
Жетісу облысының полиция департаменті оқиғаға байланысты қылмыстық іс қозғады.
«Қауіпсіздік талаптарына сай келмейтін құрылғыны орнату ережелері тексеріліп жатыр. Кінәлілер заң бойынша жауапқа тартылады. Тергеу департамент басшылығының бақылауында», – деп мәлімдеді полиция.
Назым Адилова жіберген фотода баланың терминалдың қай бөлігін ұстағаны көрінеді. Оқиға қоғамда қызу талқыға түсіп, қауіпсіздік мәселесіне назар аудартты.
«Жетісу-Ақпарат»
Фото: Баланың анасы Назым Адилова жіберген
