Ел Президенті Қасым-Жомарт ТОҚАЕВ 2020 жылы Қазақстан халқына арнаған Жолдауында 5 жыл ішінде орман қорына 2 млрд. елді мекендерде 15 млн. ағаш отырғызуды тапсырған болатын. Игілікті бастама аяқсыз қалмай өңір-өңірлерде әлі де жалғасын тауып келе жатыр. Осы орайда Наурыз мерекесінің қарсаңында Талдықорған қаласындағы Қаратал өзенінің жағалауына 150-ге жуық көшет отырғызылды.
Соңғы 5 жыл ішінде Жетісу облысының елді мекендерінде 538 мың көшет егу жоспарланған болатын. Қазіргі уақытта 418 мың ағаш тамыр жайды. Өткен көктемде 31 мың, күзде 84 мың көшет отырғызылғанын айта кеткен жөн.
– Экологиялық мәдениетті қалыптастыру мақсатында облыстық басқармалар мен департамент қызметкерлерімен бірлесіп 150-ге жуық қылқанжапырақты ағаш отырғызылды. Осы күнге дейін қала бойынша 30-ға жуық қылқанжапырақты көшет егілген болатын. Алдағы уақытта 1800 түп көшет отырғызу жоспарымызда тұр, – дейді қала әкімінің орынбасары Қуаныш Сейтімбетов.
Биыл аудан және қала аумақтарында 120 мың көшет (көктемгі кезеңде – 54,2 мың. күзгі кезеңде – 65,8 мың) отырғызу жоспарлануда. Оның ішінде 108 мыңы жалпақ жапырақты, 12 мыңы қылқанжапырақты ағаштар. Аудан және қала әкімдіктерімен көктемгі жоспарланған ағаш отырғызу жұмыстары бүгіннен басталып отыр.
Айта кетейік 22 наурыз мерекесіне орай, облыс көлемінде 5 мыңға жуық көшет отырғызу жоспарлануда. Оның 1,7 мыңы қылқанжапырақты, 3,3 мыңы жалпақ жапырақты ағаш көшеттері.
Медет ЖҰМАБАЙ
Фото: Талдықорған қаласының баспасөз қызметі
